ڈالر کے مقابلے روپے کی قدر میں مزید بہتری

انٹربینک مارکیٹ میں جمعہ کو بھی ڈالر کے مقابلے روپے کی قدر میں بہتری کا سلسلہ جاری رہا۔

کاروبار کے اختتام پر ڈالر کے مقابلے میں روپیہ ایک پیسے کی بہتری سے 279.86 روپے پر بند ہوا۔

یاد رہے کہ جمعرات کو روپیہ 279.87 پر بند ہوا تھا۔

عالمی سطح پر امریکی ڈالر کو ایک سال کی سب سے بڑی ہفتہ وار گراوٹ کا سامنا ہے جس کی وجہ صدر ڈونلڈ ٹرمپ کے گرین لینڈ سے متعلق بیانات اور اچانک پالیسی تبدیلیوں سے سرمایہ کاروں میں پیدا ہونے والی بے چینی ہے۔

بدلتی ہوئی جغرافیائی و سیاسی صورتحال نے رواں ہفتے سرمایہ کاروں کے اعتماد کو متاثر کیا، جب صدر ٹرمپ نے کہا کہ نیٹو کے ساتھ ایک معاہدے کے تحت امریکا کو گرین لینڈ تک رسائی حاصل ہو گئی ہے۔ یہ پیش رفت ایسے وقت میں سامنے آئی جب انہوں نے یورپ کے خلاف ٹیرف عائد کرنے کی دھمکیوں سے پیچھے ہٹنے اور ڈنمارک کے خودمختار علاقے گرین لینڈ پر طاقت کے ذریعے قبضہ نہ کرنے کا اعلان کیا۔

جغرافیائی کشیدگی میں اضافے کے باعث ہفتے کے آغاز میں امریکی اثاثوں میں شدید فروخت دیکھی گئی جس کا سب سے زیادہ دباؤ کرنسی مارکیٹس میں امریکی ڈالر پر پڑا اور سرمایہ کاروں کی بے چینی نے ڈالر کی قدر کو خاصا متاثر کیا۔

ڈالر انڈیکس گزشتہ سیشن میں 0.58 فیصد کمی کے بعد 98.366 پر آ گیا۔ اس طرح ڈالر ایک فیصد ہفتہ وار گراوٹ کی جانب بڑھ رہا ہے جو جنوری 2025 کے بعد اس کی بدترین ہفتہ وار کارکردگی ہوگی۔

یورو 1.1746 ڈالر پر مستحکم رہا، جبکہ برطانوی پاؤنڈ (اسٹرلنگ) 1.3496 ڈالر پر ٹریڈ کرتا رہا، جو گزشتہ سیشن میں بننے والی دو ہفتوں کی بلند ترین سطح کے قریب ہے۔