حکومت سے مذاکرات کے بعد پٹرول پمپ مالکان نے ہڑتال مؤخر کر دی، وفاقی وزیر
- علی پرویز ملک نے پٹرولیم ڈیلرز کو دو ہفتوں میں تحفظات دور کرنے کی یقین دہانی کرا دی
آل پاکستان پٹرولیم پمپ اونرز ایسوسی ایشن (اے پی پی پی او اے) نے بدھ کو حکومت کے ساتھ کامیاب مذاکرات کے بعد ملک گیر ہڑتال دو ہفتوں کے لیے مؤخر کرنے کا اعلان کر دیا۔
میڈیا سے گفتگو کرتے ہوئے وزیر مملکت برائے پٹرولیم علی پرویز ملک نے کہا کہ ایسوسی ایشن کے ساتھ ایک اور دور کے مذاکرات کے بعد یہ فیصلہ کیا گیا کہ حکومت کی جانب سے آئندہ دو ہفتوں میں پٹرولیم ڈیلرز کے تحفظات دور کرنے کی یقین دہانی پر ہڑتال مؤخر کر دی جائے۔
انہوں نے کہا، ”28 فروری سے آج تک حکومت نے ایندھن کی قیمتوں میں اضافے کے اثرات کم کرنے کے لیے تقریباً 100 ارب روپے خرچ کیے ہیں، جبکہ معاشرے کے انتہائی کمزور طبقے کے لیے سبسڈی اسکیم بھی متعارف کرائی گئی ہے۔“
وزیر مملکت نے یہ بات امریکا اور ایران کے درمیان کشیدگی کے بعد حکومت کی جانب سے کیے گئے اقدامات کا حوالہ دیتے ہوئے کہی۔
یہ پیش رفت ایک روز بعد سامنے آئی ہے، جب ایسوسی ایشن نے یومیہ بنیاد پر پٹرولیم مصنوعات کی قیمتوں کے تعین کے معاملے پر حکومت سے مذاکرات ناکام ہونے کے بعد بدھ کی شب سے ملک گیر ہڑتال کا اعلان کیا تھا۔
علی پرویز ملک نے کہا، ”خطے پر ایک بار پھر جنگ کے بادل منڈلا رہے ہیں اور ایندھن کی قیمتوں میں اضافہ ہو رہا ہے۔“ انہوں نے بتایا کہ اس صورتحال پر ان کی آل پاکستان پٹرولیم پمپ اونرز ایسوسی ایشن (اے پی پی پی او اے) کے عہدیداروں سے بات ہوئی، جنہوں نے حکومتی کوششوں کی حمایت کا اظہار کیا۔
وزیر مملکت نے کہا کہ پاکستان کی سیاسی اور عسکری قیادت ایران اور امریکا دونوں کے حکام سے رابطے میں ہے تاکہ کشیدگی کم کرنے میں مدد دی جا سکے۔
پٹرول پمپ مالکان کے تحفظات سے متعلق انہوں نے کہا کہ ڈیلرز کے مارجن کا معاملہ تمام متعلقہ فریقوں سے مشاورت کے ذریعے حل کیا جائے گا، جبکہ اس حوالے سے ایک سمری منظوری کے لیے وفاقی کابینہ کو بھی پیش کی جائے گی۔
انہوں نے مزید کہا کہ حکومت دو ہفتے بعد پٹرولیم شعبے کے متعلقہ فریقوں سے مشاورت کے بعد یومیہ بنیاد پر پٹرولیم مصنوعات کی قیمتوں کے تعین کے نظام کا بھی جائزہ لے گی۔
گزشتہ ہفتے علی پرویز ملک نے اعلان کیا تھا کہ ایران اور امریکا کے درمیان نئی کشیدگی کے باعث عالمی تیل منڈی میں اتار چڑھاؤ کو مدنظر رکھتے ہوئے پٹرولیم مصنوعات کی قیمتوں کا روزانہ جائزہ لیا جائے گا۔
پریس کانفرنس کے دوران انہوں نے یہ بھی بتایا کہ آئل اینڈ گیس ریگولیٹری اتھارٹی (اوگرا) اسی روز سے اپنی ویب سائٹ پر روزانہ ایندھن کی قیمتیں جاری کرے گی، جبکہ شفافیت بڑھانے کے لیے قیمتوں کی تفصیلی وضاحت اردو زبان میں بھی فراہم کی جائے گی۔
Comments