پاکستان نے بھارتی رجسٹرڈ طیاروں کے لیے فضائی حدود کی پابندی میں 24 فروری تک توسیع کر دی

پاکستان ایئرپورٹس اتھارٹی ( پی اے اے) نے منگل کے روز بتایا ہے کہ پاکستان نے بھارتی رجسٹرڈ طیاروں کے لیے اپنی فضائی حدود کے استعمال پر عائد پابندی میں توسیع کر دی ہے۔

پی اے اے کے مطابق بھارتی طیاروں پر عائد پابندی 24 فروری کی صبح 5 بجے تک بڑھا دی گئی ہے۔

اتھارٹی نے تصدیق کی ہے کہ یہ پابندی بھارتی ایئرلائنز کی ملکیت، زیرِ استعمال یا لیز پر لیے گئے تمام طیاروں پر لاگو ہوگی، جن میں فوجی پروازیں بھی شامل ہیں۔

پی اے اے نے کہا ہے کہ توسیع کی مدت کے دوران پاکستانی فضائی حدود بھارتی رجسٹرڈ طیاروں کے لیے بند رہے گی، تاہم مزید تفصیلات فراہم نہیں کی گئیں۔

پاکستان نے بھارت کے ساتھ بڑھتی ہوئی کشیدگی کے تناظر میں ابتدا میں فضائی حدود کی پابندی عائد کی تھی، جس کے بعد اس میں وقفے وقفے سے توسیع کی جاتی رہی ہے۔

اس پابندی کے تسلسل کے باعث بین الاقوامی روٹس پر پروازیں چلانے والی بھارتی ایئرلائنز متاثر ہو رہی ہیں، جنہیں پاکستانی فضائی حدود سے بچنے کے لیے اپنی پروازوں کے راستے تبدیل کرنا پڑتے ہیں۔