وزیر خزانہ کی عالمی اقتصادی فورم کے موقع پر سعودی ہم منصب سے سرمایہ کاری اور معاشی صورتحال پر گفتگو

وفاقی وزیرِ خزانہ سینیٹر محمد اورنگزیب نے عالمی اقتصادی فورم (ڈبلیو ای ایف) کے سالانہ اجلاس 2026 کے موقع پر سعودی وزیرِ خزانہ محمد الجدعان سے ملاقات کی۔ ملاقات میں پاکستان کی معاشی صورتحال اور سرمایہ کاری کے شعبوں میں تعاون بڑھانے پر تبادلہ خیال کیا گیا۔

ملاقات کے دوران دونوں اطراف نے پاکستان کی حالیہ معاشی ترقی پر بات چیت کی اور پاک سعودی دیرینہ معاشی شراکت داری کو مزید مضبوط بنانے کے عزم کا اعادہ کیا۔ سینیٹر اورنگزیب نے اپنے سعودی ہم منصب کو اہم معاشی اشاریوں پر بریفنگ دیتے ہوئے کہا کہ پاکستان کی معیشت اب پائیدار استحکام اور ترقی کی راہ پر گامزن ہے۔

انہوں نے بتایا کہ غیر ملکی زرمبادلہ کے ذخائر میں بہتری آئی ہے، جو اب تقریباً تین ماہ کی درآمدات کے لیے کافی ہیں، جو معاشی لچک کا عکاس ہے۔

سرمایہ کاروں کے اعتماد کا ذکر کرتے ہوئے وزیرِ خزانہ نے بتایا کہ گزشتہ سال 9 کمپنیوں کے عوامی حصص (آئی پی اوز) کے کامیاب اجرا کے بعد اب مزید 16 کمپنیاں پائپ لائن میں ہیں۔ انہوں نے مزید کہا کہ ایک لاکھ 20 ہزار سے زائد نئے سرمایہ کار کیپٹل مارکیٹ میں شامل ہوئے ہیں، جو معیشت پر بحال ہوتے اعتماد کی علامت ہے۔

وزیرِ خزانہ نے کہا کہ شرحِ سود میں کمی آنا شروع ہو گئی ہے، جبکہ انہوں نے مانیٹری پالیسی وضع کرنے میں اسٹیٹ بینک آف پاکستان کی خود مختاری کا بھی اعادہ کیا۔ انہوں نے بتایا کہ گزشتہ سال معاشی شرحِ نمو 3.1 فیصد رہی جو رواں مالی سال کی پہلی سہ ماہی میں بڑھ کر 3.7 فیصد ہو گئی ہے۔

سینیٹر محمد اورنگزیب نے کہا کہ حکومت جی ڈی پی گروتھ کے ساتھ ساتھ کرنٹ اکاؤنٹ بیلنس کو برقرار رکھنے پر توجہ مرکوز کیے ہوئے ہے۔ انہوں نے معاشی استحکام میں سمندر پار پاکستانیوں کی ترسیلاتِ زر (ریمیٹنس) کے کردار کو سراہتے ہوئے کہا کہ رواں سال ترسیلاتِ زر کا حجم گزشتہ سال کے 38 ارب ڈالر سے بڑھ کر 41 ارب ڈالر سے تجاوز کرنے کی توقع ہے۔

انہوں نے مزید بتایا کہ آئی ٹی سروسز کی برآمدات کرنٹ اکاؤنٹ پر مثبت اثر ڈال رہی ہیں اور اس ضمن میں سعودی عرب کے مسلسل تعاون کا شکریہ ادا کیا۔ وزیرِ خزانہ نے معدنیات، زراعت اور برآمدی صنعتوں جیسے ترجیحی شعبوں میں غیر ملکی براہِ راست سرمایہ کاری کو راغب کرنے کی حکومتی کوششوں پر بھی روشنی ڈالی۔

محمد اورنگزیب نے سعودی وزیر کو نجکاری پروگرام پر بھی بریفنگ دی، جس میں ڈیجیٹل منصوبوں اور پی آئی اے کی نجکاری سے متعلق پیش رفت شامل تھی۔ انہوں نے بتایا کہ حکومت اسلام آباد، لاہور اور کراچی کے ہوائی اڈوں اور بجلی کی تقسیم کار کمپنیوں (ڈسکوز) کی مرحلہ وار نجکاری کا ارادہ رکھتی ہے۔

سعودی وزیرِ خزانہ محمد الجدعان نے نجکاری کے حوالے سے سعودی عرب کے تجربات شیئر کیے اور ہوائی اڈوں کو منافع بخش اثاثوں میں تبدیل کرنے کو کامیاب معاشی اصلاحات کی مثال کے طور پر پیش کیا۔ ملاقات کے اختتام پر دونوں وزراء نے اقتصادی تعاون کو مزید مضبوط بنانے اور سرمایہ کاری کے تعلقات کو وسعت دینے کے عزم کا اعادہ کیا۔