تیل کی قیمتوں میں کمی کے ثمرات عوام تک منتقل کرنے کا مطالبہ

فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے نائب صدر امان پراچہ نے پیٹرول اور ڈیزل پر لیوی میں اضافے پر حکومت کو کڑی تنقید کا نشانہ بنایا ہے۔ انہوں نے کہا کہ ایک طرف عالمی سطح پر تیل کی قیمتوں میں کمی کا فائدہ عوام کو نہیں دیا جا رہا تو دوسری طرف مزید ٹیکس لگا کر مہنگائی کے ستائے عوام کو ذہنی اذیت میں مبتلا کیا جا رہا ہے۔

امان پراچہ نے حکومت پر زور دیا کہ مہنگائی اور کاروبار کی بڑھتی ہوئی لاگت کو کم کرنے کے لیے عالمی قیمتوں میں کمی کے ثمرات ملکی سطح پر منتقل کیے جائیں۔ انہوں نے بتایا کہ پیٹرول پر لیوی 4.65 روپے اور ڈیزل پر 80 پیسے فی لیٹر بڑھائی گئی ہے ، اگر یہ اضافہ نہ ہوتا تو پیٹرول 4.50 روپے تک سستا ہو سکتا تھا۔

انہوں نے مزید کہا کہ پاکستان میں پیٹرولیم ٹیکس دنیا میں سب سے زیادہ ہیں، مگر ان کا فائدہ عوام کی فلاح پر نہیں ہو رہا۔ حکومت ٹیکس وصولی کا رونا روتی ہے لیکن کرپشن عروج پر ہے اور ترقیاتی رفتار انتہائی سست ہے۔