2025 : چین کی ایل این جی درآمدات میں بڑی کمی، تین سال کی کم ترین سطح پر پہنچ گئیں

2025 میں چین کی مائع قدرتی گیس (ایل این جی) کی درآمدات تین سال کی کم ترین سطح پر آگئی ہیں۔جنرل ایڈمنسٹریشن آف کسٹمز کے مطابق 2025 میں چین کی ایل این جی درآمدات گزشتہ سال کے مقابلے میں 10.6 فیصد کمی کے ساتھ 68.43 ملین میٹرک ٹن رہیں۔

چینی کسٹمز کے اعداد و شمار سے یہ بھی معلوم ہوا ہے کہ دسمبر میں ایل این جی کی درآمدات میں سالانہ بنیادوں پر 19.9 فیصد کا اضافہ ہوا، جو 8.48 ملین ٹن تک پہنچ گئیں۔

قدرتی گیس کی کل درآمدات، جن میں پائپ لائن کے ذریعے سپلائی بھی شامل ہے سالانہ بنیادوں پر 2.8 فیصد کمی کے ساتھ 127.87 ملین ٹن ریکارڈ کی گئیں، جبکہ 2024 میں یہ 131.69 ملین ٹن کی ریکارڈ سطح پر تھیں۔

اعداد و شمار کے مطابق 2025 میں چین کی ہوائی جہاز کے ایندھن (ایوی ایشن فیول) کی برآمدات 15 فیصد اضافے کے ساتھ 21.76 ملین ٹن رہیں۔ صرف دسمبر میں یہ برآمدات 2.21 ملین میٹرک ٹن رہیں، جو سالانہ بنیادوں پر 71.5 فیصد کا اضافہ ظاہر کرتی ہیں۔

کسٹمز ڈیٹا سے یہ بھی ظاہر ہوا کہ 2025 میں چین کی ڈیزل برآمدات 16.7 فیصد کمی کے ساتھ 6.66 ملین ٹن رہ گئیں، تاہم دسمبر میں ڈیزل کی برآمدات 430,000 ٹن رہیں، جو گزشتہ سال کے اسی مہینے کے مقابلے میں 483.4 فیصد زیادہ ہے۔

سال بھر کے دوران پیٹرول کی برآمدات 17.6 فیصد کمی کے ساتھ 8.02 ملین ٹن ریکارڈ کی گئیں۔ ریفائنڈ آئل کی مجموعی برآمدات، جن میں بحری جہازوں کا ایندھن (میرین بینکر فیول) بھی شامل ہے 2025 میں 0.2 فیصد کی معمولی کمی کے ساتھ 58.02 ملین ٹن رہیں۔