او جی ڈی سی ایل کی بڑی کامیابی ، خیبر پختونخوا میں تیل اور گیس کے بڑے ذخائر دریافت

پاکستان کی بڑی ایکسپلوریشن اور پروڈکشن کمپنیوں میں سے ایک آئل اینڈ گیس ڈویلپمنٹ کمپنی لمیٹڈ (او جی ڈی سی ایل) نے اعلان کیا ہے کہ اس نے خیبر پختونخوا کے ضلع کوہاٹ میں کنویں میں آزمائشی کھدائی کے دوران دتا فارمیشن کے مقام پر تیل اور گیس دریافت کر لی ہے۔

او جی ڈی سی ایل نے اس پیشرفت کی تفصیلات پاکستان اسٹاک ایکسچینج (پی ایس ایکس) کو فراہم کی ہیں۔ نوٹس کے مطابق او جی ڈی سی ایل (جو کہ نشپہ ایکسپلوریشن لائسنس کا آپریٹر ہے اور 65 فیصد حصص رکھتا ہے) نے یہ دریافت اپنے شراکت داروں پاکستان پیٹرولیم لمیٹڈ (پی پی ایل) (30 فیصد) اور گورنمنٹ ہولڈنگز پرائیویٹ لمیٹڈ (جی ایچ پی ایل) (5 فیصد) کے ساتھ مل کر کی ہے۔

کنویں کی آزمائش کھدائی کے دوران دتا فارمیشن سے یومیہ 4,100 بیرل خام تیل اور 10.5 ملین اسٹینڈرڈ کیوبک فٹ گیس حاصل ہوئی ہے۔ یہ کنواں 30 دسمبر 2024 کو کھودنا شروع کیا گیا تھا اور اسے 5,170 میٹر کی گہرائی تک لے جایا گیا۔

کمپنی کا کہنا ہے کہ اس سے قبل اسی کنویں میں ’کنگریالی فارمیشن‘ کی سطح پر بھی کامیابی حاصل ہوئی تھی۔ او جی ڈی سی ایل کے مطابق یہ دریافت ملک میں توانائی کی طلب اور رسد کے فرق کو کم کرنے میں مددگار ثابت ہوگی اور اس سے کمپنی سمیت ملک کے مجموعی ذخائر میں اضافہ ہوگا۔