ٹیکس قوانین کی سنگین خلاف ورزیوں پر وسطی پنجاب میں دو شوگر ملز سیل

حکومت کی جانب سے ٹیکس قوانین کی خلاف ورزیوں کے خلاف زیرو ٹالرنس پالیسی کے مطابق فیڈرل بورڈ آف ریونیو نے وسطی پنجاب میں واقع دو شوگر ملز کو قانونی تقاضوں کی سنگین خلاف ورزیوں پر سیل کردیا ۔

پریس ریلیز میں ایف بی آر نے کہا کہ یہ انفورسمنٹ کارروائی سیلز ٹیکس ایکٹ1990 کے سیکشن سی 40 اور متعلقہ سیلز ٹیکس رولز کی دفعات کی خلاف ورزیوں کے بعد عمل میں لائی گئی جن کے تحت شوگر سیکٹر کیلئے مانیٹرنگ، کنٹرول اور کمپلائنس کے لازمی انتظامات کئے گئے ہیں۔

یہ اقدام ایف بی آر کے اس پختہ عزم کی عکاسی کرتا ہے کہ بالخصوص ہائی رسک سیکٹرز میں سیلز ٹیکس قوانین پر سختی سے عملدرآمد یقینی بنایا جائے اورمسلسل عدم کمپلائنس میں ملوث ٹیکس دہندگان کے خلاف فیصلہ کن اقدامات کئے جائیں ۔

ایف بی آر نے اس امر کا اعادہ کیا کہ تمام انفورسمنٹ اقدامات مکمل طور پر قانون کے مطابق، شفافیت اور مروجہ قانونی طریقہ کار کو یقینی بناتے ہوئے کیے جا رہے ہیں تاکہ سرکاری محاصل کا تحفظ کیا جا سکے اور قانون کی پابندی کرنے والے ٹیکس دہندگان کیلئے مساوی مسابقتی ماحول برقرار رکھا جا سکے۔

بورڈ نے رضاکارانہ کمپلائنس کی حوصلہ افزائی کے عزم کا بھی اعادہ کیا ہے جبکہ جان بوجھ کر عدم کمپلائنس اور ٹیکس قوانین کی خلاف ورزیوں کے خلاف سخت انفورسمنٹ کارروائیاں جاری رکھنے کا عندیہ دیا ہے۔