انگلینڈ کے فاسٹ بائولر جوفرا آرچر انجری کے باعث ایشز سیریز سے باہر

انگلینڈ کی کرکٹ ٹیم کے لئے بری خبر یہ ہے کہ فاسٹ بائولر جوفراآرچر فٹنس مسائل کے باعث ایشز سیریز کے بقیہ میچز سے باہر ہوگئے ہیں۔

اے ایف پی کے مطابق انگلینڈ کو ایشز سیریز میں ایک اور بڑا دھچکا اس وقت لگا جب فاسٹ بولر جوفرا آرچر کو سائیڈ سٹرین کی وجہ سے سیریز کے باقی میچز سے باہر کر دیا گیا ہے۔ اس کے ساتھ ہی بلے باز اولی پوپ کو چوتھے ٹیسٹ کے لیے ٹیم میں شامل نہیں کیا گیا ہے۔

جوفرا آرچر ابتدائی تین ٹیسٹ میچز میں انگلینڈ کے مؤثر ترین بولر ثابت ہوئے تھے، جہاں انہوں نے 80 اوورز میں 9 وکٹیں حاصل کیں ، ان کی جگہ گس ایٹکنسن کو ٹیم میں شامل کیا گیا ہے، جو جوش ٹنگ، برائیڈن کارس اور کپتان بین سٹوکس کے ساتھ مل کر بولنگ اٹیک میں شامل ہوں گے۔

اسپن بولنگ کی ذمہ داری ایک بار پھر ول جیکس کو سونپی گئی ہے۔یہ انگلینڈ کے لیے ایک بڑا نقصان ہے، جو پہلے ہی آسٹریلیا کے ہاتھوں مسلسل شکستوں کے باعث سیریز میں 0-3 سے پیچھے ہے اور جمعہ سے میلبورن کرکٹ گراؤنڈ (ایم سی جی)میں شروع ہونے والے چوتھے ٹیسٹ میں ساکھ بچانے کی کوشش کرے گا۔

اس سے قبل فاسٹ بولر مارک ووڈ بھی گھٹنے کی انجری کے باعث سیریز سے باہر ہو چکے ہیں۔ دوسری جانب نمبر تین پر ناقص کارکردگی دکھانے والے اولی پوپ کو ڈراپ کر کے جیکب بیتھل کو موقع دیا گیا ہے۔

اوپنر بین ڈکٹ جن کے حوالے سے سوشل میڈیا پر ایک متنازع ویڈیو گردش کر رہی تھی، ٹیم میں اپنی جگہ برقرار رکھنے میں کامیاب رہے ہیں۔آسٹریلیا کے خلاف ایشز سیریز کے چوتھے ٹیسٹ کے لئے انگلینڈ کی پلیئنگ الیون میں بین اسٹوکس(کپتان)ہیں، دیگر کھلاڑیوں میں زیک کرائولی، بین ڈکٹ، جیکب بیتھل، جو روٹ، ہیری بروک، جیمی سمتھ، ول جیکس، گس ایٹکنسن، برائیڈن کارس اور جوش ٹنگ شامل ہیں۔

واضح رہے کہ آسٹریلیا اور انگلینڈ کے درمیان ایشز سیریز کا چوتھا باکسنگ ڈے ٹیسٹ میچ 26 دسمبر سے میلبورن میں شروع ہوگا۔