پاکستان نے بھارت کو 191 رنز سے شکست دے کر انڈر 19 ایشیا کپ 2025 جیت لیا

پاکستان انڈر 19 نے اتوار کو آئی سی سی اکیڈمی گراؤنڈ میں کھیلے گئے فائنل میں بھارت کو 191 رنز سے شکست دے کر اے سی سی مینز انڈر 19 ایشیا کپ کا ٹائٹل اپنے نام کر لیا۔

بھارت کی جانب سے ٹاس جیت کر پہلے فیلڈنگ کے فیصلے کے بعد پاکستان نے مقررہ 50 اوورز میں 8 وکٹوں کے نقصان پر 347 رنز کا بڑا اسکور بنایا۔ پاکستانی اننگز کے ہیرو سمیر منہاس رہے جنہوں نے شاندار بیٹنگ کا مظاہرہ کرتے ہوئے 113 گیندوں پر 172 رنز اسکور کیے، ان کی اننگز میں 17 چوکے اور 9 چھکے شامل تھے۔

حمزہ ظہور نے 14 گیندوں پر 18 رنز کے ساتھ تیز آغاز کیا، جبکہ عثمان خان نے 35 اور احمد حسین نے مڈل اوورز میں 56 رنز کا اہم اضافہ کیا۔

بھارت کی جانب سے دیپیش دیویندرن سب سے کامیاب بولر رہے جنہوں نے 83 رنز دے کر 3 وکٹیں حاصل کیں، جبکہ کھلن پٹیل اور ہینل پٹیل نے دو، دو کھلاڑیوں کو آؤٹ کیا۔

جواب میں بھارت انڈر 19 کی پوری ٹیم 26.2 اوورز میں 156 رنز پر ڈھیر ہو گئی۔ دیپیش دیویندرن نے 16 گیندوں پر 36 رنز کی مزاحمتی اننگز کھیلی، جبکہ ویبھو سوریہ ونشی 26 رنز بنا سکے۔

پاکستان کی جانب سے علی رضا نے 42 رنز دے کر 4 وکٹیں حاصل کیں، عبدالصبحان نے 2، محمد سیام نے 2 اور حذیفہ احسن نے بھی 2 وکٹیں حاصل کیں۔

اس شاندار فتح کے ساتھ پاکستان نے اپنی تاریخ میں پہلی بار انڈر 19 ایشیا کپ کا مکمل ٹائٹل جیت لیا، اس سے قبل 2012 میں پاکستان اور بھارت مشترکہ چیمپئن قرار پائے تھے۔

صدر اور وزیر اعظم کی پاکستان انڈر 19 ٹیم کو مبارکباد

صدر اور وزیر اعظم نے پاکستان انڈر 19 کرکٹ ٹیم کو ایشیا کپ جیتنے پر مبارکباد دی۔صدر آصف علی زرداری نے کہا کہ بھارت کے خلاف فائنل میں شاندار فتح نوجوان کھلاڑیوں کی محنت، نظم و ضبط اور عزم کا مظہر ہے۔انہوں نے مزید کہا کہ انڈر 19 ٹیم کی کامیابی پوری قوم کے لیے فخر اور خوشی کا سبب ہے۔انہوں نے کپتان، کھلاڑیوں اور پاکستان کرکٹ بورڈ کی اجتماعی کارکردگی کو سراہا۔

وزیر اعظم شہباز شریف نے بھی پاکستانی ٹیم اور پوری قوم کو انڈر 19 ایشیا کپ جیتنے پر مبارکباد دی۔ انہوں نے کھلاڑیوں کی شاندار کارکردگی کو سراہتے ہوئے کہا کہ فائنل میں بھارت کو شکست دے کر کھلاڑیوں نے تاریخ رقم کی ہے اور پوری قوم ان نوجوان کھلاڑیوں پر فخر کرتی ہے۔

وزیر اعظم نے کہا کہ یقین ہے کہ انڈر 19 ٹیم مستقبل میں بھی ملک کے لیے بین الاقوامی شہرت حاصل کرتی رہے گی اور انہوں نے پاکستان کرکٹ بورڈ کے چیئرمین محسن نقوی اور تمام ٹیم مینجمنٹ کی کاوشوں کو بھی سراہا۔