وفاقی وزیر خوراک کا گندم کی کاشت میں اضافہ کرنے کی ضرورت پر زور

وفاقی وزیر برائے قومی غذائی تحفظ و تحقیق رانا تنویر حسین نے ملک بھر میں گندم کی کاشت میں اضافہ کرنے کی ضرورت پر زور دیا تاکہ قومی غذائی تحفظ کو یقینی بنایا جا سکے۔

رانا تنویر حسین کی زیرِ صدارت عبوری قومی گندم پالیسی 2025–26 کے تحت قائم کی گئی قومی نگران کمیٹی برائے گندم کا پہلا اجلاس وزارتِ قومی غذائی تحفظ و تحقیق میں منعقد ہوا۔اجلاس میں صوبائی اور علاقائی سیکرٹریز برائے خوراک و زراعت کے علاوہ متعلقہ محکموں کے سینئر افسران نے شرکت کی۔

اجلاس سے خطاب کرتے ہوئے وزیر خوراک نے گندم کی پاکستان کی غذائی ضروریات کو پورا کرنے میں اس کی اسٹریٹجک اہمیت پر زور دیا۔ اجلاس میں پالیسی کے مقاصد کے مطابق آنے والی گندم کی فصل کے لیے خریداری کے طریقہ کار کا بھی جائزہ لیا گیا۔

رانا تنویر حسین نے صوبائی حکومتوں پر زور دیا کہ وہ اپنے اپنے دائرۂ اختیار میں عبوری قومی گندم پالیسی 2025–26 پر مکمل عملدرآمد کو یقینی بنائیں تاکہ گندم کے کاشتکاروں اور آٹے کے صارفین کے حقوق کا تحفظ کیا جا سکے۔ انہوں نے گندم کی ویلیو چین میں نجی شعبے کی شمولیت کی اہمیت پر زور دیا تاکہ نئے کاروباری مواقع پیدا ہوں اور خصوصاً نوجوانوں کے لئے روزگار کے مواقع میسر آئیں۔

وفاقی وزیر نے مزید زور دیا کہ تمام صوبائی حکومتیں غذائی تحفظ کو یقینی بنانے کے لئے اپنی آبادی کی ضروریات کے مطابق سٹریٹجک گندم کے ذخائر برقرار رکھیں۔