سندھ میں ٹریفک کے بعد فوڈ اتھارٹی میں بھی ای چالان متعارف کرانے کا فیصلہ

سندھ حکومت نے ٹریفک کے بعد فوڈ اتھارٹی میں بھی ای چالان شروع کرنے کا فیصلہ کر لیا ہے۔

صوبائی وزیر خوراک مخدوم محبوب الزمان نے کہا ہے کہ سندھ حکومت عوامی سہولت اور شفافیت کو مدنظر رکھتے ہوئے ٹریفک کے بعد اب سندھ فوڈ اتھارٹی میں بھی ای چالان سسٹم متعارف کرانے جا رہی ہے۔

ان خیالات کا اظہار انہوں نے پاکستان پیپلز پارٹی شعبہ خواتین کی مرکزی صدر محترمہ فریال تالپور سے ملاقات کے دوران کیا۔ملاقات میں صوبائی وزیر خوراک نے محترمہ فریال تالپور کو سندھ فوڈ اتھارٹی کی ڈیجیٹلائزیشن سے متعلق تفصیلی بریفنگ دی۔ اتھارٹی جلد ایک جدید آن لائن رجسٹریشن سسٹم، جامع شکایت مینجمنٹ سسٹم اور جدید ڈیجیٹل چالاننگ سسٹم متعارف کروانے جارہی ہے۔

انہوں نے بتایا کہ محکمے میں جدید طرز کا آن لائن رجسٹریشن سسٹم، کمپلینٹ مینجمنٹ سسٹم اور ڈیجیٹل چالاننگ سسٹم متعارف کرایا جا رہا ہے جس سے پورا عمل تیز، منظم اور شفاف ہوجائے گا۔

انہوں نے مزید کہا کہ ان اقدامات کے نتیجے میں سندھ فوڈ اتھارٹی عوام کو بہتر، آسان اور شفاف خدمات فراہم کرے گی جبکہ شکایات کے اندراج اور ان کے فوری ازالے میں نمایاں بہتری آئے گی۔ خاص طور پر ڈیجیٹل چالاننگ سسٹم سے کارروائیوں میں شفافیت اور جوابدہی میں اضافہ ہوگا۔

ملاقات کے دوران فریال تالپور کو غیر معیاری خوراک اور مضر صحت اشیاء کے خلاف سندھ فوڈ اتھارٹی کی حالیہ سخت کارروائیوں سے بھی آگاہ کیا گیا۔ انہوں نے بتایا کہ صوبے بھر میں فوڈ سیفٹی کے معیار بہتر بنانے کے لیے بھرپور کریک ڈاؤن جاری ہے۔

مزید برآں صوبائی وزیر نے محکمے میں گندم اسٹاک پالیسی پر بھی تفصیلی بریفنگ دی اور بتایا کہ اس پالیسی کا مقصد سپلائی چین میں شفافیت، معیار کی بہتری، لائیو اسٹاک مینجمنٹ میں بہتری اور عوام تک محفوظ خوراک کی رسائی یقینی بنانا ہے۔

فریال تالپور نے محکمے کی کاوشوں کو سراہتے ہوئے کہا کہ سندھ حکومت عوام کی صحت و سلامتی کے لیے جدید، مؤثر اور شفاف نظام کی جانب بڑھ رہی ہے جو قابل تعریف ہے