پی آئی اے کی نجکاری کی بولی 23 دسمبر کو براہِ راست دکھائی جائے گی ، وزیراعظم شہباز

وزیر اعظم شہباز شریف نے پاکستان انٹرنیشنل ایئرلائنز (پی آئی اے ) کی نجکاری میں مکمل شفافیت اور میرٹ یقینی بنانے کی یقین دہانی کراتے ہوئے اعلان کیا ہے کہ 23 دسمبر کو ہونے والا بولی کا عمل قومی ٹیلی وژن پر براہِ راست نشر کیا جائے گا۔

وہ پی آئی اے کی نجکاری کے عمل میں شریک تمام بزنس لیڈرز اور کمپنیوں کے ساتھ اجلاس سے خطاب کر رہے تھے۔

اجلاس وزیراعظم ہاؤس میں منعقد ہوا جس میں وفاقی وزراء محمد اسحاق ڈار، احسن اقبال، محمد اورنگزیب، عطااللہ تارڑ، اعظم نذیر تارڑ، سردار اویس لغاری، وزیرِ مملکت بلال اظہر کیانی، وزیراعظم کے مشیر محمد علی، معاونِ خصوصی ہارون اختر اور سینئر حکام نے شرکت کی۔

بولی میں شامل تمام اداروں کے نمائندے بھی موجود تھے۔وزیراعظم نے کہا کہ حکومت قومی ایئرلائن کی کھوئی ہوئی ساکھ بحال کرنے اور اسے جدید ایوی ایشن اور سروس کے معیار کے مطابق ڈھالنے کے لیے پرعزم ہے۔

انہوں نے مزید کہا کہ نجکاری کا عمل پی آئی اے کو بحال کرنے اور اسے ایک مسابقتی ایئرلائن بنانے کے لیے خوش اسلوبی سے آگے بڑھ رہا ہے۔

مستقبل کی انتظامیہ پر اعتماد کا اظہار کرتے ہوئے وزیراعظم نے مزید کہا کہ ان شاء اللہ پی آئی اے ایک بار پھر اپنے نعرے گریٹ پیپل ٹو فلائی وِد پر پوری اترے گی۔ بولی کے بعد جو بھی اس کا چارج سنبھالے گا اس پر ایئرلائن کی شہرت بحال کرنے اور اس کی ترقی پر توجہ دینے کی ذمہ داری ہوگی۔

وزیراعظم نے کہا کہ پی آئی اے کی بین الاقوامی پروازوں کی بحالی سے بیرونِ ملک مقیم پاکستانیوں کو بڑی سہولت ملے گی۔ انہوں نے مزید کہا کہ قومی ایئرلائن کی اپ گریڈیشن پاکستان کے سیاحت کے شعبے کو فروغ دینے کے لیے بھی نہایت اہم ہے۔

اجلاس کے شرکا نے نجکاری کے عمل میں حکومت کی پیشہ ورانہ اور شفاف حکمتِ عملی کو سراہا۔