ٹرمپ آج وائٹ ہاؤس میں کاروباری افراد کے عشائیے کی میزبانی کریں گے

امریکی صدر ڈونلڈ ٹرمپ بدھ کو وائٹ ہاؤس میں نجی عشائیے کی میزبانی کریں گے، جس میں ناسڈیک اور جے پی مورگن کے سی ای اوز سمیت کئی بڑے کاروباری رہنما شامل ہوں گے۔

ایک انتظامی اہلکار نے رائٹرز کو بتایا کہ یہ ملاقات ٹرمپ کی کاروباری قیادت کے ساتھ تعلقات مضبوط کرنے کی کوششوں کو اجاگر کرتی ہے، جبکہ ان کی انتظامیہ امریکی سرمایہ کاری مارکیٹ اور ملکی سپلائی چین کو مضبوط بنانے کے اقدامات کر رہی ہے، جنہیں قومی سلامتی کے لیے اہم سمجھا جاتا ہے۔

جے پی مورگن نے ایک دہائی پر محیط 1.5 ٹریلین ڈالر کے سرمایہ کاری منصوبے کا اعلان کیا ہے، جس کا مقصد دفاع، ایروسپیس، توانائی کی خود مختاری اور دیگر اہم صنعتوں میں سرمایہ کاری کرنا ہے۔

اس منصوبے کے تحت 10 ارب ڈالر تک براہِ راست حصص اور وینچر کیپٹل کے ذریعے امریکی کمپنیوں میں لگائے جائیں گے جو قومی سلامتی اور اقتصادی استحکام کے لیے ضروری ہیں۔

وائٹ ہاؤس کے اہلکار نے ملاقات کی تصدیق کی، تاہم مہمانوں کی فہرست کی تصدیق نہیں کی گئی۔ ناسڈیک اور جے پی مورگن کے نمائندے فوری طور پر تبصرے کے لیے دستیاب نہیں تھے۔

ٹرمپ نے حالیہ مہینوں میں کئی نجی ملاقاتیں کی ہیں ،تاکہ اقتصادی ترقی کو فروغ دیا جا سکے اور عالمی تجارتی شراکت داروں کے ساتھ تعلقات کے دباؤ کو مدنظر رکھا جا سکے۔