میکسیکو کے اسٹور میں آگ لگنے سے بچوں سمیت 23 افراد ہلاک

میکسیکو کے شمال مغربی شہر ہرموسیلو میں ہفتے کے روز جشن کے موقع پر ایک افسوسناک حادثہ پیش آیا جب ایک ڈسکاؤنٹ اسٹور میں لگنے والی آگ نے کم از کم 23 افراد کی جان لے لی اور درجنوں کو زخمی کر دیا۔ یہ واقعہ ایسے وقت پیش آیا جب ملک بھر میں ڈے آف دی ڈیڈ کی رنگا رنگ تقریبات جاری تھیں جن میں لوگ اپنے مرحوم عزیزوں کو یاد کرتے ہیں۔

ریاست سونورا کے گورنر الفونسو دورازو نے ایک ویڈیو بیان میں کہا کہ میں نے حادثے کی وجوہات جاننے کے لیے شفاف اور جامع تحقیقات کا حکم دے دیا ہے، انہوں نے تصدیق کی کہ ہلاک ہونے والوں میں بچے بھی شامل ہیں۔

ریاست کے اٹارنی جنرل گستاوو سالاس کے مطابق، زیادہ تر اموات زہریلی گیسوں کے دھوئیں سے دم گھٹنے کے باعث ہوئیں۔ میکسیکو کی صدر کلاڈیا شینبام نے سوشل میڈیا پلیٹ فارم ایکس پر اپنے تعزیتی پیغام میں کہا کہ میں جاں بحق ہونے والوں کے اہل خانہ اور زخمیوں کے ساتھ دلی ہمدردی کا اظہار کرتی ہوں۔ انہوں نے متاثرہ خاندانوں کی مدد کے لیے خصوصی امدادی ٹیمیں روانہ کرنے کی ہدایت بھی کی۔

سونورا کی ریڈ کراس کے مطابق، اس کے 40 اہلکار اور 10 ایمبولینسیں ریسکیو کارروائی میں شریک رہیں اور چھ زخمیوں کو اسپتال منتقل کیا گیا۔

اگرچہ آگ پر قابو پا لیا گیا ہے، تاہم حکام کے مطابق اس کی اصل وجہ تاحال واضح نہیں ہو سکی۔ بعض مقامی میڈیا اداروں نے ابتدائی اطلاعات میں بتایا کہ ممکنہ طور پر آگ بجلی کے شارٹ سرکٹ سے لگی۔ شہر کے فائر بریگیڈ کے سربراہ نے کہا کہ یہ بھی تفتیش کی جا رہی ہے کہ آیا دھماکہ ہوا تھا یا نہیں۔ شہر کے حکام نے واضح کیا کہ والڈوز ڈسکاؤنٹ اسٹور کسی حملے کا نشانہ نہیں تھا۔