فیلڈ مارشل عاصم منیر کی شاہ عبداللہ دوم سے ملاقات ، دفاعی تعاون بڑھانے پر اتفاق

فیلڈ مارشل سید عاصم منیر جو اس وقت سرکاری دورے پر ہاشمی سلطنت اردن میں ہیں نے پیر کو اردن کے بادشاہ اور اردنی مسلح افواج کے سپریم کمانڈر شاہ عبداللہ دوم ابن الحسین سے ملاقات کی۔

پاک فوج کے شعبہ تعلقاتِ عامہ (آئی ایس پی آر) کے مطابق ولی عہد شہزادہ الحُسین بن عبداللہ دوم بھی ملاقات میں موجود تھے۔

ملاقات کے دوران دونوں رہنماؤں نے باہمی دلچسپی کے امور پر تبادلہ خیال کیا، خاص طور پر دفاع اور سکیورٹی کے شعبوں میں دوطرفہ تعاون کو مزید مضبوط بنانے اور خطے کی تازہ صورتحال پر گفتگو کی۔

چیف آف آرمی اسٹاف جنرل عاصم منیر نے پاکستان کے عوام، حکومت اور مسلح افواج کی جانب سے شاہ عبداللہ دوم کے لیے نیک خواہشات کا پیغام پہنچایا اور پاکستان کی جانب سے اردن کے ساتھ برادرانہ تعلقات کو مزید مضبوط بنانے کے عزم کا اعادہ کیا۔

شاہ عبداللہ دوم نے پاک فوج کے پیشہ ورانہ معیار اور علاقائی امن و استحکام میں اس کے کردار کو سراہا اور دونوں برادر ممالک کے درمیان دفاعی تعاون میں اضافے کی خواہش ظاہر کی۔

اس سے قبل آرمی چیف نے اردنی مسلح افواج کے چیئرمین جوائنٹ چیفس آف اسٹاف میجر جنرل یوسف احمد الحُنیطی سے عمان میں جنرل ہیڈکوارٹرز میں ملاقات کی۔

فیلڈ مارشل منیر کی آمد پر انہیں گارڈ آف آنر پیش کیا گیا۔ ملاقات کے دوران دونوں جانب سے پاکستان اور اردن کی افواج کے درمیان تاریخی اور دیرینہ تعلقات کو مزید مضبوط بنانے کے عزم کا اظہار کیا گیا۔

آئی ایس پی آر کے مطابق میجر جنرل الحُنیطی نے خطے میں امن و سلامتی کے فروغ میں پاک فوج کے کردار کو سراہا۔