جاپان میں ایل ڈی پی اور ایشن کے اتحاد پر اتفاق، خاتون وزیرِاعظم کی راہ ہموار

جاپان میں نئی سیاسی پیش رفت کے نتیجے میں ملک کی تاریخ کی پہلی خاتون وزیرِاعظم کے منصب سنبھالنے کی راہ ہموار ہو گئی ہے۔ خبر رساں ادارے کیوڈو نیوز کے مطابق جاپان کی لبرل ڈیموکریٹک پارٹی (ایل ڈی پی) اور جاپان انوویشن پارٹی نے اتحاد کی صورت میں حکومت سازی پر وسیع اتفاق کر لیا ہے۔

رپورٹ کے مطابق ایل ڈی پی کی قدامت پسند رہنما سانائے تاکائچی اور ایشن پارٹی کے سربراہ ہیروفومی یوشیمورا پیر کے روز اس اتحاد کے باضابطہ معاہدے پر دستخط کریں گے۔ توقع ہے کہ منگل کو پارلیمنٹ میں ہونے والے وزیرِاعظم کے انتخاب میں ایشن پارٹی تاکائچی کے حق میں ووٹ دے گی۔

تاہم کیوڈو کے مطابق ایشن پارٹی ابتدائی طور پر تاکائچی کی کابینہ میں شامل نہیں ہوگی، جس سے نئے اتحاد کی پائیداری کے بارے میں خدشات برقرار ہیں۔ یہ اتحاد اُس 26 سالہ گٹھ جوڑ کا متبادل ہے جو ایل ڈی پی اور کومیتو پارٹی کے درمیان رواں ماہ تک قائم رہا تھا۔

تاکائچی، جنہوں نے حالیہ دنوں میں ایل ڈی پی کی صدارت حاصل کی، موجودہ وزیرِاعظم شیگیرو ایشیبا کی جگہ سنبھالنے کے لیے مضبوط امیدوار کے طور پر سامنے آئی ہیں۔ رپورٹ کے مطابق ایل ڈی پی نے ایشن کو منانے کے لیے کمپنیوں سے چندہ لینے پر پابندی اور خوراک پر سیلز ٹیکس کی چھوٹ جیسی تجاویز پر کام جاری رکھنے کی یقین دہانی کرائی ہے۔

سانائے تاکائچی ایک مالیاتی طور پر نرم رویہ رکھنے والی سیاست دان مانی جاتی ہیں جو مہنگائی کے اثرات کم کرنے کے لیے زیادہ اخراجات اور ٹیکس میں کمی کی حامی ہیں۔ وہ جاپان کے امن پسند آئین میں ترمیم کی بھی حامی ہیں تاکہ ملک کی فوجی قوت کے کردار کو آئینی حیثیت دی جا سکے۔