امریکی فورسز کا وینزویلا سے منسلک کشتی پر حملہ، سوار افراد پہلی بار محفوظ رہے

امریکی افواج کی جانب سے کیریبین میں ایک کشتی پر حملے میں افراد زندہ بچ گئے، امریکی میڈیا نے جمعرات کو رپورٹ کیا کہ یہ پہلا موقع ہے جب واشنگٹن کی جانب سے وینزویلا سے مبینہ منشیات اسمگلنگ کشتیوں کو نشانہ بنانے کی کارروائیوں میں کوئی شخص زندہ بچا ہے۔

امریکہ نے حالیہ ہفتوں میں کیریبین سمندر میں کئی فوجی جہاز تعینات کیے ہیں اور مبینہ منشیات بردار کشتیوں پر متعدد مہلک حملے کیے ہیں، جن میں اب تک کم از کم 27 افراد ہلاک ہو چکے ہیں۔

تازہ حملے میں زندہ بچنے والے افراد کی تعداد اور حالت کے بارے میں پینٹاگون نے فوری طور پر کوئی معلومات فراہم نہیں کیں۔

کاراکاس میں ان حملوں سے تشویش پائی جاتی ہے کہ واشنگٹن کا اصل مقصد وینزویلا میں حکومت کی تبدیلی ہو سکتا ہے۔

امریکی صدر ڈونلڈ ٹرمپ نے بدھ کے روز کہا کہ وہ وینزویلا کی مبینہ منشیات کارٹیلز کے خلاف کارروائی کو زمینی سطح تک بڑھانے پر غور کر رہے ہیں۔ ان کے مطابق ’سمندری کارروائی پر ہمارا مکمل کنٹرول ہے، اب زمین پر توجہ دی جا رہی ہے۔‘

کولمبیا کے صدر گستاوو پیٹرو نے اقوام متحدہ سے مطالبہ کیا ہے کہ وہ ان حملوں پر ٹرمپ کے خلاف فوجداری کارروائی شروع کرے، کیونکہ ان حملوں میں کولمبیا کے شہری بھی مارے گئے ہیں۔