سونے کی قیمتیں مستحکم رہیں

پاکستان میں جمعرات کو سونے کی قیمتیں مستحکم رہیں جبکہ گزشتہ روز عالمی مارکیٹ میں سونے کے نرخ میں ریکارڈ اضافے کے تناظر میں فی تولہ قیمت 4 لاکھ 25 ہزار 178 روپے ہوگئی تھی۔

آل پاکستان جیمز اینڈ جیولرز صرافہ ایسوسی ایشن (اے پی جی جے ایس اے) کی جانب سے جاری کردہ نرخوں میں بتایا گیا ہے کہ 10 گرام سونا بھی 3 لاکھ 64 ہزار 521 روپے میں فروخت ہوا۔

بدھ کے روز مقامی مارکیٹ میں فی تولہ سونا 8,400 روپے اضافے کے بعد 4 لاکھ 25 ہزار 178 روپے تک جا پہنچا تھا۔

بین الاقوامی مارکیٹ میں بھی فی اونس سونے کی قیمت 4,039 ڈالر (20 ڈالر پریمیم سمیت) پر مستحکم رہی۔

دوسری جانب چاندی کی قیمت میں 82 روپے فی تولہ اضافہ ہوا جس کے بعد یہ 5,066 روپے فی تولہ تک پہنچ گئی۔

عالمی سطح پر جمعرات کے روز سونا اپنی ریکارڈ بلندی سے کچھ نیچے آیا کیونکہ سرمایہ کاروں نے بدھ کو 4,000 ڈالر فی اونس کی تاریخی سطح عبور ہونے کے بعد منافع حاصل کرنے کے لیے فروخت کی۔ یہ تیزی بنیادی طور پر عالمی معاشی اور جغرافیائی غیر یقینی حالات اور اس سال مزید امریکی شرحِ سود میں کمی کی توقعات سے منسلک تھی۔

جمعرات کی صبح عالمی وقت کے مطابق 6 بج کر42 منٹ تک اسپاٹ گولڈ کی قیمت 0.2 فیصد کمی کے ساتھ 4,029.86 ڈالر فی اونس رہی، جب کہ بدھ کو یہ 4,059.05 ڈالر فی اونس کی بلند ترین سطح پر پہنچی تھی۔

اسی دوران دسمبر ڈلیوری کے لیے امریکی گولڈ فیوچرز بھی 0.6 فیصد کمی کے ساتھ 4,047.80 ڈالر پر بند ہوئے۔