بھارت، دارجلنگ میں شدید بارشوں سے سیلاب اور لینڈ سلائیڈنگ، 18 افراد ہلاک

بھارتی ریاست مغربی بنگال کے مشرقی پہاڑی علاقے دارجلنگ میں مسلسل بارشوں کے باعث آنے والے سیلاب اور لینڈ سلائیڈنگ سے کم از کم 18 افراد ہلاک ہو گئے، جب کہ پڑوسی ملک نیپال میں ہلاکتوں کی تعداد 50 تک جا پہنچی ہے۔

حکام کے مطابق، بارشوں نے گھروں، سڑکوں اور پلوں کو بہا دیا، جب کہ کئی افراد اب بھی لاپتہ ہیں۔ پیر کے روز امدادی کارروائیاں شروع کر دی گئیں، تاہم حکام نے خبردار کیا ہے کہ دور دراز علاقوں سے مزید تفصیلات آنے پر ہلاکتوں کی تعداد بڑھ سکتی ہے۔

ریاست کی وزیرِ اعلیٰ ممتا بنرجی نے ایک بیان میں بتایا کہ دو آہنی پل منہدم ہو چکے ہیں، متعدد سڑکیں بہہ گئیں یا ٹوٹ گئیں، اور بڑے رقبے پر زمین زیرِ آب آ گئی ہے۔ انہوں نے کہا کہ دارجلنگ، کالیمپونگ، جالپائی گوڑی اور علی پور دوار کے اضلاع شدید متاثر ہوئے ہیں۔

بھاری بارشوں کے نتیجے میں بالاسن دریا پر واقع پل ٹوٹنے سے سیلی گڑی اور میریک کے درمیان شاہراہ کا رابطہ منقطع ہو گیا، جب کہ کئی سڑکوں پر مٹی اور ملبہ جمع ہونے سے امدادی ٹیموں کی رسائی مشکل ہو گئی ہے۔

دارجلنگ، جو اپنی چائے کی پیداوار اور پہاڑی مناظر کے لیے مشہور ہے، میں سیاح پھنسے ہوئے ہیں۔ ممتا بنرجی نے ان سے اپیل کی ہے کہ جب تک محفوظ انخلا ممکن نہ ہو، اپنی جگہ پر ہی رہیں۔

دوسری جانب، نیپال کے مشرقی ضلع ایلام میں مختلف مقامات پر زمین کھسکنے کے 37 واقعات میں متعدد گھر تباہ ہو گئے، جب کہ امدادی اہلکار ملبہ ہٹا کر زندہ بچ جانے والوں کی تلاش میں مصروف ہیں۔