انکم ٹیکس گوشوارے جمع کرانے کی تاریخ میں 15 دن کی توسیع، نئی ڈیڈ لائن 15 اکتوبر مقرر

فیڈرل بورڈ آف ریونیو (ایف بی آر) نے منگل اور بدھ کی درمیانی شب اعلان کیا کہ ٹیکس سال 2025 کے لیے انکم ٹیکس گوشوارے جمع کرانے کی آخری تاریخ میں 15 دن کی توسیع کردی گئی ہے، اور اب نئی آخری تاریخ 15 اکتوبر 2025 مقرر کی گئی ہے۔

اس سے قبل یہ مدت 30 ستمبر 2025 کو ختم ہونا تھی۔

ایف بی آر نے اپنے بیان میں کہا کہ یہ فیصلہ انکم ٹیکس آرڈیننس 2001 کی شق 214 اے کے تحت کیا گیا ہے۔

بیان میں کہا گیا کہ تاریخ میں توسیع مختلف تجارتی تنظیموں، ٹیکس بار ایسوسی ایشنز اور عوام کی درخواستوں کے جواب میں دی گئی ہے۔

اس سے قبل ٹیکس وصولی کے ادارے نے کسی بھی قسم کی توسیع کی خبروں کو یکسر مسترد کر دیا تھا اور واضح کیا تھا کہ 30 ستمبر ہی گوشوارے جمع کرانے کی حتمی تاریخ ہے۔

سوموار کو جاری کردہ ایک بیان میں ایف بی آر نے کہا تھا کہ مختلف میڈیا پلیٹ فارمز پر گردش کرنے والی غیر مصدقہ خبروں کا نوٹس لیا گیا ہے جن میں دعویٰ کیا جارہا تھا کہ انکم ٹیکس گوشوارے جمع کرانے کی تاریخ میں توسیع کردی جائے گی۔

بیان کے مطابق ایف بی آر واضح کرتا ہے کہ یہ خبریں غلط، بے بنیاد اور گمراہ کن ہیں کیونکہ ٹیکس سال 2025 کے گوشوارے جمع کرانے کی تاریخ میں کوئی توسیع نہیں کی گئی۔

ایف بی آر نے اس بات پر بھی زور دیا کہ زیادہ تر ٹیکس دہندگان ایسے علاقوں میں مقیم ہیں جو حالیہ سیلاب سے متاثر نہیں ہوئے اور انہیں اپنے قومی فریضے یعنی گوشوارے جمع کرانے کے لیے کافی وقت میسر رہا ہے۔

مزید کہا گیا کہ اس کی آئرس سسٹم کے سست روی اختیار کرنے کی رپورٹس بھی بے بنیاد ہیں۔ ایف بی آر کا آئی رس پلیٹ فارم مکمل طور پر فعال ہے، باآسانی کام کر رہا ہے اور ٹیکس دہندگان نئے سادہ انکم ٹیکس ریٹرن فارم کے ذریعے اپنے گوشوارے جمع کرا سکتے ہیں۔

ایف بی آر نے یہ انتباہ بھی کیا کہ آخری تاریخ تک گوشوارے جمع نہ کرانے کی صورت میں ٹیکس دہندگان کو لیٹ فائلر کا درجہ دیا جائے گا اور قانون کے تحت جرمانے بھی عائد ہوں گے۔