وزیراعظم کی ہدایت پر ایف بی آر کے ٹیکس گوشواروں سے ’تخمینی مارکیٹ ویلیو‘ کا خانہ حذف

فیڈرل بورڈ آف ریونیو (ایف بی آر) نے وزیراعظم شہباز شریف کی منظوری کے بعد انکم ٹیکس گوشواروں سے ”تخمینی منصفانہ مارکیٹ ویلیو“ کا خانہ حذف کرنے کا اعلان کر دیا ہے۔ یہ اقدام ٹیکس فائلنگ کے عمل کو آسان بنانے کے لیے کیا گیا ہے۔

ایف بی آر کے جاری کردہ اعلامیے کے مطابق وزیراعظم نے ایک اعلیٰ سطح کی کمیٹی تشکیل دی تھی جس کی سربراہی وفاقی وزیر قانون سینیٹر اعظم نذیر تارڑ نے کی۔ کمیٹی کا مقصد اس نئی شرط کا جائزہ لینا تھا، جس کے تحت ٹیکس دہندگان کو اپنے منقولہ و غیر منقولہ اثاثوں کی تخمینی منصفانہ مارکیٹ ویلیو ظاہر کرنا لازم قرار دیا گیا تھا۔

کمیٹی میں وفاقی وزیر برائے پیٹرولیم، وزیر مملکت برائے خزانہ، اٹارنی جنرل، ڈپٹی وزیراعظم آفس میں رابطہ کاری کے لیے معاونِ خصوصی، سیکریٹری خزانہ، چیئرمین ایف بی آر اور ممبر کسٹمز شامل تھے۔ جمعہ کو ہونے والے اجلاس میں تفصیلی مشاورت کے بعد یہ سفارش پیش کی گئی کہ ٹیکس دہندگان کو درپیش مشکلات کو مدنظر رکھتے ہوئے مذکورہ خانہ گوشوارے سے حذف کر دیا جائے۔

یہ سفارش بعد ازاں وزیراعظم نے منظور کر لی۔

ایف بی آر کے مطابق وزیراعظم کی ہدایات کی روشنی میں اور ٹیکس دہندگان کو درپیش مشکلات کے پیشِ نظر انکم ٹیکس گوشوارے سے ’تخمینی منصفانہ مارکیٹ ویلیو‘ کا خانہ حذف کر دیا گیا ہے۔

ایف بی آر نے وضاحت کی کہ یہ خانہ صرف معاشی سروے کے لیے اعدادوشمار کے حصول کی غرض سے متعارف کرایا گیا تھا اور اس کا آمدن کے تعین یا ٹیکس واجبات پر کوئی اثر نہیں تھا۔

ایف بی آر نے ٹیکس دہندگان کو سہولت فراہم کرنے کے عزم کا اعادہ کرتے ہوئے تمام اہل افراد پر زور دیا کہ وہ اپنے گوشوارے بروقت اور درست طور پر جمع کرائیں۔ ٹیکس گوشوارے جمع کرانے کی آخری تاریخ 30 ستمبر 2025 ہے۔