ماسکو کی طرف بڑھتے 33 یوکرینی ڈرون روسی فضائی دفاع نے تباہ کر دیے

روس کے حکام کے مطابق پیر کی رات سے منگل کی صبح تک روسی فضائی دفاعی یونٹوں نے 33 یوکرینی ڈرون مار گرائے جو ماسکو کی طرف بڑھ رہے تھے، جبکہ کریمیا اور مغربی روس کے دیگر حصوں میں بھی درجنوں ڈرون تباہ کیے گئے۔

ماسکو کے میئر سرگئی سوبیانین نے میسجنگ ایپ ٹیلیگرام پر بتایا کہ بارہ گھنٹوں کے دوران شہر کی طرف آنے والے یہ ڈرون راستے ہی میں تباہ کر دیے گئے۔ انہوں نے کہا کہ ماہرین زمین پر موجود ملبے کا معائنہ کر رہے ہیں۔

ماسکو کے شیریمیٹیوو ایئرپورٹ، جو مسافروں کی تعداد کے لحاظ سے روس کا سب سے بڑا ہوائی اڈہ ہے، پر پروازیں تاخیر کا شکار ہوئیں اور بعض منسوخ بھی کر دی گئیں۔

روسی قومی فضائی کمپنی ایئروفلوت نے کہا کہ منگل کے اختتام تک ایئرپورٹ پر معمول کی پروازوں کو مکمل طور پر بحال کر دیا جائے گا۔

روسی وزارتِ دفاع نے ٹیلیگرام پر بتایا کہ اس کے فضائی دفاعی یونٹوں نے مقامی وقت کے مطابق آدھی رات (2100 جی ایم ٹی) تک 81 یوکرینی ڈرون مار گرائے، جبکہ آدھی رات سے صبح 7 بجے (0400 جی ایم ٹی) تک مزید 69 ڈرون تباہ کیے گئے۔

رائٹرز اس رپورٹ کی آزادانہ طور پر تصدیق نہیں کر سکا۔

کریمیا کے بندرگاہی شہر سیواستوپول (جہاں روس کا بحیرہ اسود کا بیڑا تعینات ہے) کے گورنر میکائل رازووژایف نے کہا کہ فضائی دفاعی یونٹوں نے بندرگاہ کے قریب کم از کم چھ ڈرون مار گرائے۔ گرتے ہوئے ملبے سے کھلی جگہ پر آگ لگ گئی تھی جسے بعد ازاں بجھا دیا گیا۔

وسطی روس کے علاقے تولا کے گورنر دیمتری ملیایف نے کہا کہ تین ڈرون مار گرائے گئے جن سے نہ کوئی نقصان ہوا اور نہ ہی کوئی جانی نقصان ہوا۔

یوکرین کی سرحد سے ملحقہ بیلگورود کے گورنر ویچسلاو گلاڈکوف نے کہا کہ والدین اپنے بچوں کو گھروں میں رکھیں اور یہ بھی بتایا کہ علاقے کے دو شاپنگ سینٹرز عارضی طور پر بند کر دیے گئے ہیں۔