پی ٹی سی ایل اور ٹیلی نار کے انضمام کا فیصلہ دو ہفتوں میں متوقع ہے، چیئرمین سی سی پی

مسابقتی کمیشن آف پاکستان (سی سی پی) پی ٹی سی ایل اور ٹیلی نار انضمام کے جائزے کو مکمل کرنے کے قریب ہے اور توقع ہے کہ آئندہ دو ہفتوں میں ایک جامع فیصلہ جاری کرے گا۔

سی سی پی کے چیئرمین کبیر سدھو نے یہ بات جمعہ کے روز سینیٹ کی قائمہ کمیٹی برائے انفارمیشن ٹیکنالوجی کے اجلاس میں بتائی ہے۔

انہوں نے کمیٹی کو بریفنگ دیتے ہوئے کہا کہ ”پی ٹی سی ایل پاکستان کے لیے ایک اسٹریٹجک اہمیت کی حامل کمپنی ہے۔“

سی سی پی کے جاری کردہ بیان کے مطابق سدھو نے کہا ہے کہ ”بڑی کمپنیوں کے لین دین کے جائزے میں خاصا وقت لگتا ہے۔ کمیشن جلد ہی دونوں کمپنیوں کے انضمام پر ایک جامع فیصلہ جاری کرے گا۔“

سدھو نے بعد ازاں کمیٹی کو آگاہ کیا کہ کمیشن ممکنہ طور پر آئندہ دو ہفتوں میں فیصلہ جاری کر دے گا۔

اس سے قبل دن میں ٹیلی نار نے ایک بیان میں تشویش کا اظہار کیا کہ دسمبر 2023 میں لین دین کے اعلان کے 21 ماہ بعد بھی ٹیلی نار پاکستان کی پاکستان ٹیلی کمیونیکیشن کمپنی لمیٹڈ (پی ٹی سی ایل) کو فروخت کے لیے ریگولیٹری منظوری کا عمل تاخیر کا شکار ہے۔

ٹیلی نار نے کہا: ”یہ ایشیا بھر میں ٹیلی کام انضمامات کی منظوریوں کے واضح اور مستقل رجحان سے انحراف ہے۔“

کمپنی نے اس بات کو اجاگر کیا کہ پاکستان میں جاز، جو موبائل سبسکرائبرز کے 38 فیصد حصے اور ریونیو کے تخمیناً 44 فیصد حصے کی مالک ہے، 2016 میں موبی لنک اور وارد کے انضمام سے وجود میں آئی تھی۔ کمپنی نے بتایا کہ اس لین دین کو صرف تین ماہ میں منظوری مل گئی تھی۔

ٹیلی نار گروپ کے ہیڈ آف ایم اینڈ اے، آرنسٹین سلیٹموئے نے کہا: ”ٹیلی نار پاکستان کی پی ٹی سی ایل کو مجوزہ فروخت مکمل ہونے پر 36 فیصد موبائل سبسکرائبرز اور تقریباً 32 فیصد ریونیو حصے کے ساتھ ایک نمبر دو موبائل آپریٹر تشکیل دے گی۔ یہ ایشیا میں منظور شدہ دیگر لین دین کی حدود کے اندر ہے، جن میں سے کئی میں اس سے زیادہ مارکیٹ ارتکاز شامل ہے۔“

گزشتہ ماہ، سی سی پی نے پی ٹی سی ایل سے ٹیلی نار پاکستان اور اورین ٹاورز (پرائیویٹ) لمیٹڈ کے 100 فیصد حصص کے مجوزہ حصول سے متعلق اہم معاملات پر مزید وضاحت طلب کی تھی۔