ایشیا کپ: وسیم اکرم کا پاک بھارت میچ سے قبل اہم مشورہ

سابق فاسٹ بولر وسیم اکرم نے پاکستانی اور بھارتی کرکٹرز کو مشورہ دیا ہے کہ وہ اتوار کو ہونے والے ایشیا کپ ٹی 20 میچ میں شوروغل کو نظرانداز کریں اور کھیل کے ہر لمحے کا لطف اٹھائیں۔

واضح رہے کہ چار ماہ قبل پیش آنے والے فوجی تنازع کے بعد یہ دونوں ممالک کے درمیان کرکٹ کا پہلا مقابلہ ہوگا۔

دونوں ملکوں کے درمیان حالیہ کشیدگی کے تناظر میں سابق کپتان وسیم اکرم نے کہا کہ لطف اٹھائیں، یہ کرکٹ کا کھیل ہے۔

کرکٹ کے علاوہ ہر چیز کو بھول جائیں۔ ایک ٹیم جیتے گی اور ایک ٹیم ہارے گی۔

انہوں نے مزید کہا کہ میچ کے دوران دباؤ آئے گا، اسے قبول کریں، کھلاڑی اور تماشائی نظم و ضبط قائم رکھیں اور حد پار نہ کریں۔

وسیم اکرم نے کہا کہ پاکستان کے پاس میچ جیتنے کا پورا موقع ہے کیونکہ انہوں نے پچھلے ہفتے اسی کنڈیشن میں ایک ٹرائی سیریز جیتی ہے۔

انہیں یہ نہیں سوچنا چاہیے کہ صرف بھارت کے خلاف جیتنا ضروری ہے بلکہ ایشیا کپ جیتنے کے بارے میں سوچیں۔ آپ بڑی ٹیم کے خلاف ہار سکتے ہیں، لیکن اٹھیں اور ٹورنامنٹ میں اچھا کھیلیں۔

وسیم اکرم نے بھارت کے حالیہ فتح کے حوالے سے کہا کہ مجھے نہیں لگتا کہ میچ یک طرفہ ہوگا جیسا کہ بھارت نے یو اے ای کے خلاف کھیلا، جہاں انہوں نے میزبان ٹیم کو صرف 57 رنز پر آؤٹ کرنے کے بعد اپنے ہدف تک پہنچنے کے لیے صرف 4.3 اوورز لیے۔

فاسٹ بولر نے کہا کہ اس ٹورنامنٹ میں کچھ بھی ہوسکتا ہے۔

پاکستان نے جمعہ کو اپنے افتتاحی میچ میں عمان کو 93 رنز سے شکست دی۔

گروپ بی میں سری لنکا، افغانستان، ہانگ کانگ اور بنگلہ دیش شامل ہیں۔

ہر گروپ کی ٹاپ دو ٹیمیں سپر فور میں کوالیفائی کریں گی۔

ایشیا کپ کا فائنل 28 ستمبر کو دبئی میں ہوگا۔