زاہد میر نے پاکستان ریفائنری لمیٹڈ کے منیجنگ ڈائریکٹر اور سی ای او کے عہدے سے استعفیٰ دیدیا

زاہد میر نے پاکستان ریفائنری لمیٹڈ (پی آر ایل) کے منیجنگ ڈائریکٹر اور چیف ایگزیکٹو آفیسر (سی ای او) کے عہدے سے استعفیٰ دے دیا ہے، تاہم وہ 31 دسمبر 2025 تک اس عہدے پر برقرار رہیں گے تاکہ ذمہ داریوں کی منتقلی باقاعدگی سے مکمل کی جا سکے۔

پاکستان ریفائنری لمیٹڈ نے یہ معلومات اپنے اسٹیک ہولڈرز کو پاکستان اسٹاک ایکسچینج میں جمع کرائے گئے نوٹس میں جمعرات کو فراہم کیں۔

پاکستان ریفائنری لمیٹڈ کی ویب سائٹ پر دستیاب معلومات کے مطابق، زاہد میر یکم اگست 2019 سے منیجنگ ڈائریکٹر اور سی ای او کے طور پر خدمات انجام دے رہے ہیں۔

مئی میں، زاہد میر کو ریفائنری کے منیجنگ ڈائریکٹر اورسی ای او کے طور پر دوبارہ دو سال کی مدت کے لیے مقرر کیا گیا تھا، جو یکم اگست 2025 سے 31 جولائی 2027 تک مؤثر ہونی تھی۔

ایک پیٹرولیم انجینئر اور ایم بی اے ہونے کے ناطے، وہ تیل اور گیس کی صنعت میں سرکاری اور نجی شعبے کی کمپنیوں کے لیے کام کرتے ہوئے 32 سال سے زائد کا متنوع تکنیکی اور انتظامی تجربہ رکھتے ہیں۔

انہیں آن شور اور آف شور دونوں آپریشنز کا وسیع تجربہ حاصل ہے، اور وہ اپ اسٹریم آپریشنز کے تمام مراحل میں اعلیٰ سطح پر شامل رہے ہیں۔

انہوں نے فیلڈ آپریشنز، پروڈکشن، کانسیپچوئل انجینئرنگ، پراجیکٹ ڈویلپمنٹ اور ایگزیکیوشن کے اعلیٰ عہدوں پر کام کیا ہے، اور پاکستان اور برطانیہ میں قومی اور بین الاقوامی کمپنیوں کے ساتھ کام کر چکے ہیں۔

پاکستان ریفائنری لمیٹڈ کی ویب سائٹ پر موجود معلومات کے مطابق انہوں نے پہلے شیل، کوفپیک، پریمیئر آئل اور او جی ڈی سی ایل کے لیے کام کیا ہے۔ ان کی آخری تعیناتی او جی ڈی سی ایل کے منیجنگ ڈائریکٹر/سی ای او کے طور پر تھی۔