ڈالر کے مقابلے روپے کی قدر میں بہتری کا سلسلہ جاری

انٹربینک مارکیٹ میں مسلسل 22 ویں روز ڈالر کے مقابلے روپے کی قدر میں بہتری کا سلسلہ جاری رہا۔

کاروبار کے اختتام پر پیر کو ڈالر کے مقابلے روپیہ 3 پیسے یا 0.01 فیصد کی بہتری سے 281.62 روپے پر بند ہوا۔

یاد رہے کہ گزشتہ ہفتے بھی امریکی ڈالر کے مقابلے میں روپیہ 12 پیسے یا 0.04 فیصد کی بہتری سے 281.65 پر بند ہوا تھا۔

بین الاقوامی سطح پر جاپانی وزیرِاعظم شیگیریو ایشیبا کے استعفٰی کی خبر کے بعد پیر کو جاپانی ین میں مجموعی طور پر کمی دیکھی گئی جبکہ کمزور امریکی جابز کی رپورٹ کے باعث امریکی ڈالر میں گراوٹ آئی ۔ اس رپورٹ نے اس توقع کو مزید مضبوط کر دیا کہ رواں ماہ فیڈرل ریزرو شرحِ سود میں کمی کرے گا۔

جاپان کے ایشیبا نے اتوار کو اپنے استعفے کا اعلان کیا جس سے دنیا کی چوتھی بڑی معیشت کے لیے ایک غیر یقینی پالیسی دور کا آغاز ہوسکتا ہے جو پہلے ہی ایک نازک مرحلے سے گزر رہی ہے۔

پیر کو ایشیائی تجارت میں اس اعلان کے بعد ین کی قدر میں کمی ہوئی اور وہ امریکی ڈالر کے مقابلے میں 0.6 فیصد گر کر 148.25 پر آگیا۔

جاپانی کرنسی یورو اور اسٹرلنگ کے مقابلے میں بھی پھسل کر بالترتیب 173.91 اور 200.33 تک جا پہنچی، جو کہ ایک سال سے زائد کی کم ترین سطح ہے۔

دریں اثنا امریکی ڈالر اپنے بڑے نقصانات سے کچھ حد تک سنبھل رہا ہے جس میں جزوی طور پر ین کی کمزوری نے بھی مدد کی، حالانکہ جمعہ کے اعداد و شمار کے بعد اس میں نمایاں کمی آئی تھی جنہوں نے امریکی لیبر مارکیٹ میں مزید کمزوری کو ظاہر کیا۔

نان فارم پے رولز رپورٹ کے مطابقں امریکہ میں بیروزگاری کی شرح بڑھ کر تقریباً چار سال کی بلند ترین سطح 4.3 فیصد تک جا پہنچی۔

سی ایم ای فیڈ واچ ٹول کے مطابق، رپورٹ کے اجرا کے بعد سرمایہ کاروں نے اس ماہ کے آخر میں فیڈ کی جانب سے غیر معمولی 50 بیسز پوائنٹس شرحِ سود میں کمی کے امکانات پر زیادہ زور دینا شروع کر دیا ہے، اور اب وہ اس اقدام کے لیے 8 فیصد امکان ظاہر کر رہے ہیں، جبکہ ایک ہفتہ قبل ایسا کوئی امکان نہیں تھا۔

ڈالر کے مقابلے اسٹرلنگ 0.11 فیصد کم ہو کر 1.3492 ڈالر پر آ گیا، حالانکہ جمعہ کو اس میں 0.5 فیصد سے زیادہ اضافہ ہوا تھا۔ یورو بھی اسی طرح 0.11 فیصد کم ہو کر 1.1709 ڈالر پر آ گیا، حالانکہ جمعہ کو یہ ایک ماہ سے زائد کی بلند ترین سطح پر پہنچا تھا۔

ڈالر انڈیکس 97.87 پر مستحکم رہا جبکہ جمعہ کو اس میں 0.5 فیصد سے زیادہ کمی واقع ہوئی تھی۔