پاک فضائیہ کا یومِ شہدا، تمام ایئر بیسز پر شہدا کو خراجِ عقیدت پیش کرنے کی تقریبات

پاک فضائیہ (پی اے ایف) نے اتوار کو یومِ شہدا نہایت عقیدت و احترام کے ساتھ تمام بیسز پر تقاریب منعقد کر کے منایا اور اُن جانبازوں کو خراجِ عقیدت پیش کیا جنہوں نے وطنِ عزیز کے دفاع میں اپنی جانیں نثار کیں۔

آئی ایس پی آر کے مطابق دن کا آغاز خصوصی دعاؤں اور قرآن خوانی سے ہوا، جس میں 1965 اور 1971 کی جنگوں کے شہدا کے علاوہ آزادی کے بعد مختلف محاذوں پر جانیں قربان کرنے والے جوانوں کو یاد کیا گیا۔

مرکزی تقریب ایئر ہیڈ کوارٹرز اسلام آباد میں منعقد ہوئی، جس میں چیف آف ایئر اسٹاف ایئر چیف مارشل ظہیراحمد بابر سدھو بطور مہمانِ خصوصی شریک ہوئے۔

اپنے خطاب میں ایئر چیف نے کہا کہ یہ دن پاک افواج کی جرات، پیشہ ورانہ مہارت اور جذبۂ قربانی کی علامت ہے۔ انہوں نے کہا کہ پی اے ایف بدلتی ہوئی سیکورٹی صورتحال سے مکمل طور پر آگاہ ہے اور ملک کی فضائی سرحدوں کے دفاع کے لیے پرعزم ہے۔

انہوں نے شہدا کو خراجِ تحسین پیش کرتے ہوئے کہا کہ ان کی عظیم قربانیاں آنے والی نسلوں کے لیے ہمیشہ مشعلِ راہ رہیں گی۔ ساتھ ہی انہوں نے مقبوضہ جموں و کشمیر کے عوام سے اظہارِ یکجہتی کرتے ہوئے کہا کہ پی اے ایف اُن کی حقِ خودارادیت کی جدوجہد میں ان کے ساتھ ہے۔

ایئر چیف نے مزید کہا کہ پی اے ایف خلا، الیکٹرانک وارفیئر، سائبر ٹیکنالوجیز، جدید شعبوں اور مقامی دفاعی پیداوار میں اپنی صلاحیتوں کو مزید بڑھانے کے لیے پرعزم ہے۔

بعد ازاں ایئر چیف مارشل نے یادگارِ شہداء پر پھول چڑھائے اور فاتحہ خوانی کی۔