جنوبی افریقی کرکٹ ٹیم کا دورہ پاکستان، سیریز کا شیڈول سامنے آ گیا

پاکستان رواں سال اکتوبر اور نومبر میں جنوبی افریقہ کی میزبانی کرے گا جہاں دونوں ممالک کے درمیان ٹیسٹ، ون ڈے انٹرنیشنل اور ٹی20 انٹرنیشنل سیریز کھیلی جائے گی۔

جنوبی افریقی دورے کے دوران دو ٹیسٹ، تین ون ڈے اور تین ٹی20 میچز کھیلیں جائیں گے ۔

سیریز کا کوئی بھی میچ کراچی میں نہیں کھیلا جائے گا جس سےشہر قائد کے شائقین کو شدید مایوسی ہوئی ہے۔

پاکستان کرکٹ بورڈ کی پریس ریلیز کے مطابق پاکستان اپنا آئی سی سی ورلڈ ٹیسٹ چیمپئن شپ 2025-27 کا آغاز بھی اسی سیریز سے کریگا۔

پہلا ٹیسٹ لاہور کے قذافی اسٹیڈیم میں 12 سے 16 اکتوبر تک کھیلا جائے گا۔

دوسرا ٹیسٹ راولپنڈی کرکٹ اسٹیڈیم میں 20 سے 24 اکتوبر تک کھیلا جائے گا۔

ریڈ بال میچز کے اختتام پر دونوں ٹیمیں تین ٹی 20 میچ کھیلیں گی، جو 28 اکتوبر سے یکم نومبر تک ہوں گے، پہلا ٹی20 میچ راولپنڈی کرکٹ اسٹیڈیم میں کھیلا جائے گا، جبکہ باقی دو ٹی 20 میچ قذافی اسٹیڈیم میں ہوں گے۔

سیریز کا اختتام تین ون ڈے میچوں سے ہوگا، جو 4 سے 8 نومبر تک فیصل آباد کے اقبال اسٹیڈیم میں کھیلے جائیں گے۔

پی سی بی کے چیف آپریٹنگ آفیسر سمیر احمد سید نے کہا کہ پاکستان جنوبی افریقہ کو آئی سی سی ورلڈ ٹیسٹ چیمپئن شپ 2025-27 کی افتتاحی سیریز کے لیے خوش آمدید کہنے کا منتظر ہے۔

موجودہ ٹیسٹ چیمپیئن کے خلاف نئے دور کا آغاز ہمارے کھلاڑیوں اور شائقین کے لیے اعلیٰ معیار کی کرکٹ فراہم کرے گا۔

اس کے علاوہ انہوں نے کہا کہ فیصل آباد میں 17 سال بعد ون ڈے کرکٹ کی واپسی ایک خاص لمحہ ہے۔