کیل کارپ کا ہیلیوس ریزول ٹیکنالوجی کی مکمل ملکیت حاصل کرنے کا اعلان

کیل کارپ لمیٹڈ (کیش) نے اعلان کیا ہے کہ وہ اپنے وابستہ ادارے ہیلیوس ریزول ٹیکنالوجی (پرائیویٹ) لمیٹڈ کو مکمل طور پر حاصل کرنے کا ارادہ رکھتی ہے۔ اسپیشل اکنامک زون میں قائم یہ کمپنی سولر ماڈیولز، بیٹریوں اور انورٹرز کی تیاری کا منصوبہ رکھتی ہے۔ یہ مجوزہ خریداری شیئر ہولڈرز کی منظوری سے مشروط ہے۔

یہ اعلان کیل کارپ نے جمعہ کو پاکستان اسٹاک ایکسچینج کو بھیجے گئے نوٹس میں کیا۔

کمپنی کے مطابق، بورڈ آف ڈائریکٹرز نے 4 ستمبر کو منعقدہ اجلاس میں ہیلیوس میں سرمایہ کاری کی تجویز کا جائزہ لیا اور فیصلہ کیا کہ یہ معاملہ بطور خصوصی قرارداد شیئر ہولڈرز کی منظوری کے لیے عام اجلاس میں پیش کیا جائے۔

نوٹس میں کہا گیا کہ قانونی اور ریگولیٹری تقاضے پورے ہونے کی صورت میں کیل کارپ، ہیلیوس کے 50 ہزار عام ووٹنگ شیئرز (جو اس کی 100 فیصد ملکیت ہوں گے) ایک لاکھ روپے میں حاصل کرے گی، یعنی فی شیئر 2 روپے کے حساب سے۔

اگرچہ ہیلیوس نے تاحال تجارتی سرگرمیاں شروع نہیں کیں، تاہم کمپنی بن قاسم انڈسٹریل پارک (BQIP-SEZ) میں دو ایکڑ زمین حاصل کر چکی ہے اور اسپیشل اکنامک زون اتھارٹی کو پہلی قسط کے طور پر 3 کروڑ 50 لاکھ روپے ادا کر چکی ہے۔ 30 جون 2025 تک ہیلیوس نے 17 لاکھ روپے بطور کیپٹل ورک اِن پروگریس درج کیے تھے۔

کیل کارپ کے مطابق، ہیلیوس فوٹو وولٹائک ماڈیولز، بیٹری سسٹمز اور انورٹرز و متعلقہ آلات کی تیاری یا اسمبلنگ کا ارادہ رکھتی ہے۔ کمپنی کو 10 سالہ ٹیکس فری اسٹیٹس بھی حاصل ہوگا، جو کمرشل آپریشنز کی ایس ای زی ڈیولپر سے تصدیق کے بعد نافذ العمل ہوگا۔

کمپنی نے مزید بتایا کہ غیر معمولی عام اجلاس (ایکسٹرا آرڈینری جنرل میٹنگ) کی تاریخ اور مقام کا اعلان بعد میں کیا جائے گا۔