چشمہ شوگر ملز نے اپنی ملکیتی ذیلی کمپنی کے ساتھ انضمام کی منظوری دے دی

چشمہ شوگر ملز لمیٹڈ (سی ایچ اے ایس) جو ملک کی بڑی شوگر ملز میں شمار ہوتی ہے کے بورڈ آف ڈائریکٹرز نے اپنی مکمل ملکیت والی ذیلی کمپنی الٹی میٹ ہول فوڈز (پرائیویٹ) لمیٹڈ کے ساتھ انضمام کی منظوری دے دی ہے۔

لسٹڈ کمپنی نے جمعرات کو اس پیش رفت سے متعلق اسٹاک ایکسچینج کو نوٹس جاری کیا۔

نوٹس میں بتایا گیا کہ ہمیں یہ اطلاع دیتے ہوئے خوشی ہورہی ہے کہ بورڈ آف ڈائریکٹرز نے کمپنی کے ذاتی ملکیتی ذیلی ادارے الٹی میٹ ہول فوڈز (پرائیویٹ) لمیٹڈ کے ساتھ انضمام کی اسکیم کی منظوری دے دی ہے۔

نوٹس میں بتایا گیا کہ انضمام کی اسکیم کی درخواست منظوری کے لیے سیکیورٹیز اینڈ ایکسچینج کمیشن آف پاکستان (ایس ای سی پی) کو جمع کروا دی گئی ہے اور انضمام کا عمل باضابطہ طور پر شروع ہو چکا ہے۔

کمپنی کے مطابق مجوزہ مؤثر تاریخ 10 جون 2025 مقرر کی گئی ہے۔

کمپنی نے کہا کہ یہ حکمتِ عملی پر مبنی اقدام آپریشنز کو بہتر انداز میں مربوط کرنے، انتظامی کارکردگی کو فروغ دینے اور طویل مدتی بنیادوں پر گروپ کی مالی و عملی حیثیت کو مستحکم کرنے میں معاون ثابت ہوگا۔

فائلنگ کے وقت چشمہ شوگر کی شیئر قیمت 74 روپے ریکارڈ کی گئی جو گزشتہ دن کے مقابلے میں 4 روپے یا 5.71 فیصد اضافے کی نشاندہی کرتی ہے۔

چشمہ شوگر بنیادی طور پر چینی کی تیاری، پیداوار، پروسیسنگ، کمپاؤنڈنگ اور فروخت کے ساتھ دیگر متعلقہ مرکبات، انٹرمیڈیٹس اور مصنوعات کے کاروبار میں سرگرم عمل ہے۔

یہ کمپنی دی پریمیئر شوگر ملز اینڈ ڈسٹلری کمپنی لمیٹڈ کی ذیلی ادارہ ہے۔