پاکستان پیٹرولیم پر رینسم ویئر حملہ ناکام، اہم ڈیٹا محفوظ رہا

پاکستان پٹرولیم لمیٹڈ (پی پی ایل)، جو ایک تیل و گیس کی تلاش کرنے والی کمپنی ہے، نے اپنی آئی ٹی انفراسٹرکچر کے کچھ حصوں پر رینسم ویئر حملے کی اطلاع دی ہے، جو 6 اگست 2025 کو دریافت ہوا۔ تاہم کمپنی نے کہا کہ اس واقعہ پر فوری طور پر قابو پا لیا گیا اور کسی اہم نظام یا حساس ڈیٹا کو کوئی نقصان نہیں پہنچا۔

ای اینڈ پی کمپنی نے یہ پیش رفت جمعہ کو پاکستان اسٹاک ایکسچینج (پی ایس ایکس) کو اپنے نوٹس میں بتائی۔

نوٹس کے مطابق ہم آپ کو آگاہ کرنا چاہتے ہیں کہ پاکستان پٹرولیم لمیٹڈ (پی پی ایل) نے حال ہی میں ایک سائبر سکیورٹی واقعہ شناخت کیا ہے، جس میں رینسم ویئر کے ذریعے ہماری آئی ٹی انفراسٹرکچر کے کچھ حصوں کو نشانہ بنایا گیا۔

کمپنی نے بتایا کہ یہ واقعہ 6 اگست 2025 کو پیش آیا، جس کے بعد پی پی ایل کے اندرونی سائبر سکیورٹی پروٹوکول فوراً فعال کر دیے گئے۔

بیان کے مطابق آئی ٹی اور سائبر سکیورٹی ٹیموں نے، بیرونی ماہرین کے تعاون سے، بروقت اور مؤثر اقدامات کیے، جن میں احتیاطی تدابیر کے طور پر چند غیر اہم آئی ٹی سروسز کو عارضی طور پر معطل کرنا شامل تھا تاکہ ممکنہ اثرات کو محدود کیا جا سکے اور نظام کی سالمیت کو یقینی بنایا جا سکے۔

پی پی ایل نے بتایا کہ اس کے کثیر سطحی سائبر سکیورٹی فریم ورک کی بدولت یہ خطرہ تیزی سے دور کر دیا گیا۔

کمپنی نے وضاحت کی کہ کاروبار کے لیے اہم یا حساس ڈیٹا کے متاثر ہونے کا کوئی ثبوت نہیں ہے۔ بنیادی آپریشنل سسٹمز محفوظ ہیں اور کسی قسم کا تعطل نہیں آیا۔

کمپنی نے بتایا کہ ایک بیرونی گروپ کی جانب سے رینسم ویئر نوٹ موصول ہوا۔

کمپنی نے مزید بتایا کہ قانونی تقاضوں کے مطابق، اس معاملے کو متعلقہ قانون نافذ کرنے والے اور ریگولیٹری اداروں کو رپورٹ کر دیا گیا ہے۔ تحقیقات ان ایجنسیوں کے ساتھ مل کر جاری ہیں۔

بیان میں کہا گیا کہ ہیکرز سے کوئی رابطہ نہیں کیا گیا۔

بیان کے مطابق مالیاتی لین دین (ادائیگیاں) دستی طور پر کی گئیں اور جان بوجھ کر نظام کو لین دین کے لیے استعمال نہیں کیا گیا جب تک مکمل اسکین نہ ہو جائے۔

پی پی ایل نے بتایا کہ وہ اپنی سائبر حفاظت کو مزید مضبوط بنانے کے لیے جامع فرانزک تجزیہ کرنے کے لیے پرعزم ہے۔

کمپنی کا مزید کہنا تھا کہ آئی ٹی ٹیموں نے محفوظ اور مرحلہ وار طریقے سے مکمل سسٹم کی بحالی کے لیے انتھک محنت کی۔ پی پی ایل اپنی ڈیجیٹل انفراسٹرکچر کے تحفظ کو سب سے زیادہ ترجیح دیتا ہے اور بروقت کارروائی اور فعال سائبر رسک مینجمنٹ کے ذریعے اپنے اسٹیک ہولڈرز کے اعتماد کو برقرار رکھنے پر توجہ مرکوز رکھتا ہے۔