حکومت سے آئی ٹی اور فری لانسرز کیلئے علیحدہ ریگولیٹری سیل قائم کرنے کا مطالبہ

آئی ٹی انڈسٹری اور فری لانسرز کے اسٹیک ہولڈرز نے حکومت کو سفارش کی ہے کہ وہ ایک علیحدہ ریگولیٹری سیل قائم کرے جو اہم اقدامات، خاص طور پر ڈیٹا اکٹھا کرنے کے عمل کی نگرانی کرے۔

یہ تجویز وفاقی وزیر برائے انفارمیشن ٹیکنالوجی و ٹیلی کمیونیکیشن شیزا فاطمہ کی زیر صدارت اسلام آباد میں ہونے والے ورکنگ گروپ کے اجلاس میں زیر بحث آئی، جو وزیرِ اعظم شہباز شریف کی ہدایات پر بلایا گیا تھا۔

اجلاس میں فیڈرل بورڈ آف ریونیو (ایف بی آر) کے چیئرمین، اسٹیٹ بینک آف پاکستان (ایس بی پی) کے گورنر، وزارت آئی ٹی و ٹیلی کام کے سیکریٹری اور دیگر اہم شخصیات نے شرکت کی۔

ورکنگ گروپ نے آئی ٹی سیکٹر کی ترقی، مہارت میں اضافہ، اور برآمدات کے فروغ کے لیے درست ڈیٹا کی بنیاد پر ٹارگیٹڈ معاونت پر زور دیا تاکہ ایک واضح روڈ میپ تیار کیا جا سکے۔

گروپ نے سفارش کی کہ سافٹ ویئر کمپنیوں، ان کے ملازمین، برآمدات، ٹیکس ریکارڈ، عالمی موجودگی اور فراہم کردہ خدمات سے متعلق جامع ڈیٹا اکٹھا کیا جائے۔ اسی طرح فری لانسرز اور ریموٹ ورکرز کی معلومات — بشمول ان کے مقام، اسناد، آمدنی، کام کی نوعیت اور سرٹیفکیشنز — بھی ریکارڈ کی جائیں۔

گروپ نے اسٹیٹ بینک پر زور دیا کہ وہ آر فارم میں اصلاحات اور ٹریکنگ میکانزم کو سادہ بنا کر آئی ٹی سیکٹر کو بہتر تجزیات فراہم کرے، تاکہ کمپنی اور فرد کی سطح پر ڈیٹا تک رسائی ممکن ہو۔

مزید یہ کہ جامعات کے ساتھ تعاون کے ذریعے آئی ٹی اور دیگر شعبوں کے گریجویٹس کا ڈیٹا بیس تشکیل دیا جائے۔

تجویز کے مطابق، نیا ریگولیٹری سیل آئی ٹی انڈسٹری اور فری لانسرز کی سرگرمیوں کی نگرانی و ترویج کرے گا، ان کی کاروباری توسیع میں مدد دے گا اور برآمدات سے حاصل شدہ زرمبادلہ کو فروغ دے گا۔

یہ سیل مارکیٹنگ ایونٹس میں معاونت کرے گا اور آئی ٹی کمپنیوں و فری لانسرز کو رسمی چینلز اپنانے کی ترغیب دے گا۔

ریگولیٹری سیل کی ذمہ داریوں میں تربیت، رہنمائی اور سرٹیفکیشن فریم ورک کی نگرانی بھی شامل ہوگی، نیز انسانی وسائل کی مہارت میں اضافے کے لیے مفت تربیت، لیپ ٹاپ اسکیمز اور کو ورکنگ اسپیسز فراہم کیے جائیں گے۔

اپ ڈیٹ شدہ ڈیٹا بیس کی مدد سے رجسٹرڈ فری لانسرز کو سالانہ مراعات دی جا سکیں گی، جیسا کہ تصدیق شدہ ترسیلات پر مفت کریڈٹس۔

ورکنگ گروپ میں شریک اہم شخصیات میں گورنر اسٹیٹ بینک جمیل احمد، چیئرمین ایف بی آر راشد محمود لنگڑیال، پاکستان فری لانسرز ایسوسی ایشن (پی اے ایف ایل اے) کے چیئرمین ابراہیم امین، وزارت آئی ٹی کے سیکریٹری ضرار ہشام خان، پاکستان سافٹ ویئر ایکسپورٹ بورڈ کے سی ای او ابوبکر، سسٹمز لمیٹڈ کے سی ای او آصف پیر، اور اگنائٹ کے سی ای او عدیل اعجاز شیخ شامل تھے۔

گروپ نے حکومت سے مطالبہ کیا کہ آئی ٹی انڈسٹری اور فری لانسرز کے لیے ٹیکس چھوٹ میں توسیع کی جائے، جو اگلے سال ختم ہو رہی ہے۔

پی اے ایف ایل اے کے چیئرمین ابراہیم امین نے کہا کہ حکومت آئی ٹی انڈسٹری اور فری لانسرز کی ترقی کے لیے مختلف اقدامات اور پروگرامز کے ذریعے پرعزم ہے۔

انہوں نے مزید کہا کہ اگر موجودہ مسائل حل کر لیے جائیں تو فری لانسرز کے ذریعے ترسیلات زر میں نمایاں اضافہ ممکن ہے۔

ابراہیم امین نے حکومت سے مطالبہ کیا کہ آئی ٹی کمپنیوں اور فری لانسرز کو بھی وہی مراعات دی جائیں جو اوورسیز پاکستانیوں کو روشن ڈیجیٹل اکاؤنٹ کے تحت دی جا رہی ہیں۔