ڈی جی آئی ایس پی آر نے آرمی چیف کے صدر بننے کی خبروں کو مسترد کر دیا

پاک فوج نے آرمی چیف فیلڈ مارشل عاصم منیر کے صدرِ مملکت بننے سے متعلق خبروں کو مسترد کر دیا ہے۔

برطانوی جریدے ”دی اکانومسٹ“ کو دیے گئے ایک انٹرویو میں ڈی جی آئی ایس پی آر لیفٹیننٹ جنرل احمد شریف چوہدری نے ان خبروں کو قطعی بے بنیاد قرار دیا۔

گزشتہ ماہ بھی حکومت کی جانب سے ایسی افواہوں کو رد کر دیا گیا تھا۔

وفاقی وزیر داخلہ محسن نقوی نے ایکس (سابق ٹوئٹر) پر بیان میں کہا تھا کہ ہم بخوبی جانتے ہیں کہ اس مذموم مہم کے پیچھے کون ہے، جو صدر آصف علی زرداری، وزیر اعظم شہباز شریف اور چیف آف آرمی اسٹاف کو نشانہ بنا رہی ہے۔

انہوں نے مزید کہا کہ نہ تو صدر کے مستعفی ہونے سے متعلق کوئی بات چیت ہوئی ہے، اور نہ ہی آرمی چیف کے صدر بننے کی کوئی خواہش یا منصوبہ زیر غور ہے۔

وزیر داخلہ کے مطابق صدر زرداری نے کہا کہ مجھے معلوم ہے کہ یہ جھوٹی باتیں کون پھیلا رہا ہے، ان کا مقصد کیا ہے، اور اس پروپیگنڈے سے فائدہ کس کو پہنچے گا۔

محسن نقوی کا کہنا تھا کہ آرمی چیف فیلڈ مارشل عاصم منیر کی واحد ترجیح پاکستان کی طاقت اور استحکام ہے، اور کچھ نہیں۔

دریں اثنا، بھارت کے ساتھ بڑھتی ہوئی کشیدگی کے بارے میں پوچھے گئے سوال پر ڈی جی آئی ایس پی آر نے خبردار کیا کہ اگر بھارت نے جارحیت کی تو پاکستان کی جانب سے سخت اور ممکنہ طور پر غیر روایتی جواب دیا جائے گا۔

آج نیوز کے مطابق ڈی جی آئی ایس پی آر کا کہنا تھا کہ پاکستان مشرق سے شروع ہوگا۔

”بھارت کو سمجھنا چاہیے کہ اُسے بھی کہیں بھی نشانہ بنایا جا سکتا ہے۔“