سازگار نے جون 2025 میں فور ویلر گاڑیوں کی فروخت کا دوسرا بلند ترین ریکارڈ قائم کیا

سازگار انجنیئرنگ ورکس (ایس اے زیڈ ای ڈبلیو) نے جمعہ کے روز اطلاع دی ہے کہ جون 2025 میں اس نے اپنی فور ویلر گاڑیوں کے 1,349 یونٹس فروخت کیے، جو ایک مقامی ریسرچ ہاؤس کے مطابق کمپنی کی کسی بھی ایک ماہ میں دوسری بلند ترین فروخت ہے۔

کمپنی نے اپریل 2025 میں پیش گوئی کی تھی کہ پاکستان میں معاشی استحکام اور شرحِ سود میں کمی کے باعث گاڑیوں کی طلب میں اضافہ متوقع ہے۔

یاد رہے کہ ایس اے زیڈ ای ڈبلیو نے اگست 2022 میں چین کی گریٹ وال موٹرز (جی ڈبلیو ایم) کے ساتھ شراکت داری کے تحت پاکستان میں اپنی پہلی فور ویل گاڑی متعارف کروائی تھی۔

سازگار انجنیئرنگ ورکس (ایس اے زیڈ ای ڈبلیو) کی جانب سے پاکستان اسٹاک ایکسچینج (پی ایس ایکس) کو بھیجے گئے نوٹیفکیشن کے مطابق جون 2025 میں کمپنی نے 1,349 چار پہیوں والی گاڑیاں فروخت کیں، جو کہ اس ماہ کے دوران تیار کی گئی 985 یونٹس کی تعداد سے کہیں زیادہ تھیں۔

ٹاپ لائن ریسرچ نے اپنی مختصر تجزیاتی رپورٹ میں کہا ہے کہ سازگار انجنیئرنگ ورکس نے جون 2025 میں فور ویلر گاڑیوں کی فروخت کا دوسرا بلند ترین ریکارڈ قائم کیا۔

جون میں فروخت گزشتہ ماہ (مئی) کے مقابلے میں 47 فیصد زیادہ رہی، جب کہ گزشتہ سال کے اسی مہینے کے مقابلے میں فروخت میں 2.55 گنا اضافہ ریکارڈ کیا گیا۔ مالی سال 2025 کے دوران مجموعی فروخت 10,844 یونٹس تک پہنچ گئی، جو کہ مالی سال 2024 کے مقابلے میں دو گنا اضافہ ہے۔

نوٹیفکیشن کے مطابق کمپنی نے جون 2025 میں 2,435 تھری وہیلرز (رکشا وغیرہ) فروخت کیے، جب کہ اسی ماہ ان کی پیداوار 1,420 یونٹس رہی، جو ظاہر کرتا ہے کہ طلب پیداوار سے کہیں زیادہ تھی۔

کمپنی کی مارچ 2025 کی تیسری سہ ماہی مالیاتی رپورٹ کے مطابق، مالی سال 2025 کے پہلے نو ماہ (جولائی تا مارچ) میں سازگار انجنیئرنگ ورکس نے 8,313 فور وہیلرز فروخت کیں، جو کہ مالی سال 2024 کے اسی عرصے میں فروخت ہونے والی 3,205 گاڑیوں کے مقابلے میں 159 فیصد زیادہ ہیں۔

مالیاتی بیان میں کہا گیا ہے کہ آٹو سیکٹر بتدریج بحالی کی جانب گامزن ہے اور معاشی استحکام کے ساتھ گاڑیوں کی فروخت میں اضافہ دیکھنے میں آ رہا ہے۔ شرحِ سود میں کمی سے آٹو فنانسنگ اور گاڑیوں کی طلب میں مزید بہتری کی توقع ہے۔

اس وقت سازگار انجنیئرنگ ورکس پاکستان میں تقریباً چھ مختلف ماڈلز کی گاڑیاں فروخت کر رہی ہے، جن میں ایک ہائبرڈ الیکٹرک وہیکل (ایچ ای وی) ہیوال بھی شامل ہے۔

کمپنی نے اعلان کیا ہے کہ وہ مالی سال 2026 کے دوسرے حصے میں نئی توانائی والی گاڑیاں (این ای ویز) پاکستانی مارکیٹ میں متعارف کرائے گی۔ اس مقصد کے لیے کمپنی اپنی این ای وی سہولت پر سرمایہ جاتی اخراجات (کیپ ایکس) میں 155 فیصد اضافہ کرنے جا رہی ہے۔

جمعہ کے روز سازگار کے حصص کی قیمت 1,172 روپے فی شیئر سے کھلنے کے بعد دن کے دوران 1,248.85 روپے کی بلند ترین سطح تک پہنچ گئی، تاہم کاروبار کے اختتام پر قیمت 1,192.32 روپے پر بند ہوئی۔ یوں یومیہ اضافہ 28.87 روپے یا 2.48 فیصد رہا۔