دوست اسٹیلز کا بلیٹ کی تیاری کے لیے بذریعہ رائٹس ایشو 4.45 ارب روپے اکٹھے کرنے کا اعلان

دوست اسٹیلز لمیٹڈ،ایک پاکستانی اسٹیل بنانے والی کمپنی، نے اسٹیل بلیٹس کی پیداوار کے لیے ملٹنگ فرنس کی تنصیب کی غرض سے رائٹس ایشو کے ذریعے 4.45 ارب روپے (تقریباً 15.6 ملین امریکی ڈالر) اکٹھے کرنے کا منصوبہ بنایا ہے۔

یہ پیش رفت پیر کے روز پاکستان اسٹاک ایکسچینج (پی ایس ایکس) کو جمع کروائی گئی کمپنی کی فائلنگ میں ظاہر کی گئی ہے۔

فائلنگ کے مطابق رائٹس ایشو کا حجم کمپنی کے موجودہ ادا شدہ سرمایہ کے تقریباً 100 فیصد کے برابر ہوگا، یعنی کمپنی کے حصص یافتگان کو ان کے پاس موجود ہر 100 عام شیئرز کے بدلے 100 رائٹ شیئرز دیے جائیں گے۔

کمپنی 444,695,577 عام شیئرز اجرا کرے گی، جو کہ فی شیئر 10 روپے کے حساب سے جاری ہوں گے اور اس سے مجموعی طور پر 4.45 ارب روپے اکٹھے کیے جائیں گے۔

کمپنی کے مطابق رائٹس ایشو کا مقصد ملٹنگ فرنس کی تنصیب اور عملی آغاز کے لیے فنڈز اکٹھا کرنا ہے تاکہ بلیٹس کی پیداوار شروع کی جا سکے۔ اس کے علاوہ یہ رقم کمپنی کی ورکنگ کیپیٹل ضروریات کو پورا کرنے کے لیے بھی استعمال کی جائے گی۔

دوست اسٹیلز لمیٹڈ (ڈی ایس ایل) نے بتایا ہے کہ ملٹنگ فرنس کی تنصیب سے کمپنی خود بلیٹس تیار کرے گی، جو کہ اس کے تیار شدہ مصنوعات کے لیے بنیادی خام مال کی حیثیت رکھتے ہیں۔

بیان میں کہا گیا ہے کہ اس اقدام سے خام مال کی لاگت میں نمایاں کمی آئے گی، جس کے نتیجے میں منافع کا مارجن بہتر ہوگا۔

اس کے علاوہ منصوبہ عملی کارکردگی میں بہتری، سپلائی چین پر زیادہ کنٹرول اور کاروبار کی طویل مدتی پائیداری کو سہارا دے گا۔

بیان میں مزید کہا گیا ہے کہ ان بہتریوں کے نتیجے میں منافع میں اضافہ اور حصص یافتگان کی قدر میں بہتری متوقع ہے، جو کمپنی کی مالی پوزیشن اور مارکیٹ میں مسابقتی حیثیت کو مضبوط بنائے گا۔

کمپنی کا کہنا تھا کہ رائٹس ایشو موجودہ مارکیٹ قیمت کے قریب نرخ پر جاری کیا جا رہا ہے، اس لیے اس میں کسی بڑے خطرے کا امکان نہیں۔

تاہم کاروبار سے جڑے معمول کے خطرات برقرار رہیں گے۔

پیر کے روز ڈی ایس ایل کا شیئر 0.18 روپے کمی کے ساتھ 7.24 روپے پر بند ہوا، جو 2.43 فیصد کی کمی کو ظاہر کرتا ہے۔