اسرائیل ایران میں آیت اللہ حکومت کے ہر ہدف کو نشانہ بنائے گا، نیتن یاہو کی دھمکی

اسرائیلی وزیرِ اعظم بنیامین نیتن یاہو نے ہفتے کے روز دھمکی دی ہے کہ وہ ایران میں آیت اللہ حکومت کے ہر ہدف کو نشانہ بنائیں گے، اور کہا کہ اسرائیلی حملوں نے تہران کے جوہری پروگرام کو حقیقی نقصان پہنچایا ہے۔

ویڈیو بیان میں نیتن یاہو نے کہا کہ ہم آیت اللہ حکومت کی ہر تنصیب، ہر ہدف کو نشانہ بنائیں گے۔

انہوں نے مزید کہا کہ جمعے سے اب تک ہم نے ان کے جوہری پروگرام کو ایک حقیقی ضرب لگائی ہے۔

نیتن یاہو نے دعویٰ کیا کہ ہم نے تہران تک راستہ صاف دیا ہے۔ بہت جلد آپ اسرائیلی طیاروں کو، ہماری فضائیہ کو، ہمارے پائلٹس کو، تہران کی فضاؤں میں دیکھیں گے۔

یہ بیان اُس وقت سامنے آیا جب اسرائیلی فوج نے بتایا کہ اس نے تہران میں رات کے دوران 40 اہداف کو نشانہ بنایا، جن میں میزائل تنصیبات اور جدید فضائی دفاعی نظام شامل ہیں۔

اسرائیل نے جمعہ کے روز ایران پر ایک غیر معمولی حملہ کیا جس میں مبینہ طورپر 200 سے زائد عسکری اور جوہری تنصیبات کو نشانہ بنایا گیا۔ اسرائیلی فوج کے ترجمان ایفی ڈفرین نے تصدیق کی ہے۔ حملے میں مبینہ طورپر اعلیٰ فوجی کمانڈرز، جوہری سائنس دان اور دیگر سینئر حکام مارے گئے ہیں۔

ہفتے کے روز وزیرِ اعظم بنیامین نیتن یاہو نے کہا کہ جو کچھ وہ اب تک محسوس کر چکے ہیں، وہ کچھ بھی نہیں، جو آنے والے دنوں میں ہماری طاقت کے سامنے وہ محسوس کریں گے، اس کے مقابلے میں۔

انہوں نے مزید کہا کہ ہم پوری قوت سے کارروائی کر رہے ہیں تاکہ ریاستِ اسرائیل کو درپیش اس دہرے خطرے کو ختم کیا جا سکے، اشارہ ایران کے جوہری پروگرام اور بیلسٹک میزائل صلاحیتوں کی طرف تھا۔

ایران کے مطابق اسرائیلی حملے کی پہلی لہر میں 78 افراد شہید اور 320 زخمی ہوئے۔

جوابی کارروائی میں ایران نے اسرائیل پر ڈرونز اور میزائلوں کی بارش کر دی، جس کے نتیجے میں تین افراد ہلاک، 70 سے زائد زخمی اور متعدد شہروں میں نقصان ہوا ہے۔