فوجی تنصیبات کو نشانہ بنانا قابل قبول نہیں، سپریم کورٹ

سپریم کورٹ آف پاکستان نے کہا ہے کہ اگر فوجی تنصیبات پر حملوں کا رجحان نہ روکا گیا تو ملک میں مستقبل میں انارکی پھیل سکتی ہے۔ سات رکنی آئینی بینچ، جس کی سربراہی جسٹس امین الدین خان کر رہے تھے، نے فوجی عدالتوں میں عام شہریوں کے ٹرائل کے فیصلے کے خلاف انٹرا کورٹ اپیلوں کی سماعت کی۔

جسٹس سید حسن اظہر رضوی نے ریمارکس دئیے کہ ہر سیاسی مسئلے پر لوگ فوج اور اس کی تنصیبات کو نشانہ بناتے ہیں، جبکہ پولیس یا گورنر ہاؤس جیسے دیگر اداروں کو نہیں۔ انہوں نے موجودہ حالات کا موازنہ 1971 سے کیا اور کہا کہ 9 مئی کو سیاسی کارکنوں نے مختلف مقامات پر فوجی تنصیبات پر حملے کیے۔

جسٹس محمد علی مظہر نے کہا کہ فوج خود سے شہریوں پر اختیار حاصل نہیں کرنا چاہتی، بلکہ اسے ایسے بحرانوں میں مدد کے لیے بلایا جاتا ہے۔ تاہم، پی ٹی آئی کے بانی چیئرمین عمران خان کے وکیل، عزیر بھنڈاری نے مؤقف اختیار کیا کہ 9 مئی کے ملزمان کے فوجی عدالتوں میں ٹرائل کا فیصلہ کور کمانڈرز کانفرنس میں ہوا اور بعد میں پارلیمنٹ نے اس کی توثیق کی۔ انہوں نے پارلیمنٹ کی آزادی پر سوال اٹھاتے ہوئے آئین کی پاسداری پر زور دیا۔

عزیز بھنڈاری نے آرٹیکل 10ا ے کا حوالہ دیتے ہوئے کہا کہ ایف بی علی کیس کے بعد عدالتی نظیریں تبدیل ہو چکی ہیں اور اب ہر فیصلے میں وجوہات بیان کرنا ضروری ہے۔ جسٹس نعیم اختر افغان نے کہا کہ سابقہ مقدمات مختلف قانونی پس منظر میں طے کیے گئے تھے۔ انہوں نے ملک میں جاری دہشت گردی اور بغاوت کے خدشات پر روشنی ڈالی اور متاثرین کے حقوق پر بھی غور کرنے کی ضرورت پر زور دیا۔

بینچ میں اس پر بحث ہوئی کہ آیا عام شہریوں کے فوجی عدالتوں میں ٹرائل ہونے چاہئیں۔ جسٹس حسن رضوی نے سوال کیا کہ کیا عمران خان نے 9 مئی کے واقعات کی مذمت کی؟ جس پرعزیز بھنڈاری نے جواب دیا کہ انہوں نے عدالت میں یہ مؤقف اختیار کیا ہے۔ انہوں نے مزید کہا کہ آرٹیکل 245 فوج کو عدالتی اختیارات نہیں دیتا۔

عدالت نے کیس کی مزید سماعت منگل تک ملتوی کر دی۔

کاپی رائٹ بزنس ریکارڈر، 2025