افغان سرحد سے پاکستان میں دراندازی کی کوشش ناکام بنادی گئی

سیکیورٹی فورسز نے پاک افغان سرحد پر دہشت گردوں اور افغان طالبان کی دراندازی کی متعدد کوششوں کو ناکام بنا دیا ہے۔

27 اور 28 دسمبر کی رات کو 20 سے 25 دہشت گردوں کے ایک گروپ نے کرم اور شمالی وزیرستان میں دو مقامات سے افغان طالبان کی سرحدی چوکیوں کا استعمال کرتے ہوئے پاکستان میں داخل ہونے کی کوشش کی۔ تاہم، ذرائع نے بتایا کہ پاکستانی سیکورٹی فورسز نے فوری طور پر کارروائی کی اور ان کی دراندازی کی کوشش کو ناکام بنا دیا۔ انہوں نے بتایا کہ دہشت گردوں نے ہفتہ کی علی الصبح افغان طالبان کی سرحدی چوکیوں کو استعمال کرتے ہوئے ایک بار پھر پاکستان میں داخل ہونے کی کوشش کی اور ان کی ناکامی پر پاکستانی سرحدی چوکیوں پر بھاری ہتھیاروں سے بلا اشتعال فائرنگ کی۔

جس پر پاکستان کی سکیورٹی فورسز نے پوری قوت کے ساتھ جوابی کارروائی کی۔ ذرائع کا کہنا ہے کہ افغانستان کی جانب بھاری جانی نقصان ہوا ہے جس میں 15 سے زائد دہشت گرد اور افغان طالبان جنگجو ہلاک اور متعدد زخمی ہوئے ہیں۔

ذرائع نے بتایا کہ موثر فوری کارروائی اور گولہ باری کی وجہ سے افغان طالبان فورسز اپنی چھ چوکیوں کو چھوڑ کر فرار ہو گئیں۔

فائرنگ کے تبادلے میں پاکستانی سیکیورٹی اہلکاروں کی شہادت کی کوئی اطلاع نہیں ہے جبکہ فائرنگ کے تبادلے میں تین فوجی زخمی ہوئے ہیں۔ ذرائع کا کہنا ہے کہ پاکستان نے بارہا عبوری افغان حکومت پر زور دیا ہے کہ وہ دہشت گردوں کو پاکستان مخالف سرگرمیوں کے لیے افغان سرزمین استعمال کرنے سے روکے۔ تاہم افغان طالبان مبینہ طور پر ان عناصر کو دبانے کے بجائے ان کی حمایت جاری رکھے ہوئے ہیں۔ ذرائع کا کہنا ہے کہ دہشت گرد افغانستان کے اندر آزادانہ طور پر کام کرتے ہیں اور پاکستان کے خلاف دہشت گردی کی کارروائیاں کرتے ہیں۔