سال کے آخر تک قرضوں کے معاہدوں پر دستخط کرینگے، سری لنکن حکومت

مالی بحران سے دوچار سری لنکا نے جمعرات کے روز اس عزم کا اظہار کیا ہے کہ وہ بین الاقوامی مالیاتی فنڈ (آئی ایم ایف) کی جانب سے مقرر کردہ محصولات کے سخت اہداف پر عمل کرتے ہوئے 2025 کے بجٹ سے ایک ماہ قبل اپنے طویل عرصے سے التوا کا شکار غیر ملکی قرضوں کی ری اسٹریکچرنگ مکمل کر لے گا۔

سری لنکا نے اپریل 2022 میں اپنے 46 ارب ڈالر کے بیرونی قرضے ادا نہیں کیے تھے کیونکہ خوراک اور ایندھن جیسی انتہائی ضروری درآمدات کے لیے بھی زرمبادلہ ختم ہو گیا تھا۔

آئی ایم ایف کے امدادی پیکج اور کفایت شعاری میں اصلاحات کے نفاذ کے بعد اس کی معیشت بحال ہوئی ہے جس کا مقصد حکومت کی تباہ حال مالی حالت کو ٹھیک کرنا ہے۔

اقتصادی ترقی کے نائب وزیر انیل جینتا فرنینڈو نے کہا کہ قرضوں کی ری اسٹریکچرنگ میں دو سال سے زیادہ کی تاخیر ہوئی ہے جس کی وجہ سے ملک کو سود کی مد میں 1.7 بلین ڈالر کا اضافی بوجھ اٹھانا پڑا ہے۔

فرنینڈو نے کہا، “ہم 31 دسمبر تک دو طرفہ قرضوں اور بین الاقوامی خودمختار بانڈز کی ری اسٹریکچرنگ مکمل کرنے کی امید کر رہے ہیں۔

بائیں بازو کی صدر انورا کمارا ڈسنائیکے نے ستمبر میں اقتدار سنبھالنے کے بعد پارلیمنٹ کو بتایا کہ ان کی حکومت فروری میں اپنی پہلی آمدنی اور اخراجات کی تجاویز پیش کرے گی۔

ڈیسا نائیکے نے گزشتہ ماہ اعلان کیا تھا کہ وہ اپنے پیشرو کی جانب سے 12.55 ارب ڈالر کے بین الاقوامی خودمختار بانڈز کی ری اسٹریکچرنگ کے معاہدے کا احترام کریں گے، جو آئی ایم ایف کے چار سالہ بیل آؤٹ قرض کو برقرار رکھنے کے لیے ایک اہم شرط ہے۔

قرضوں کی ری اسٹریکچرنگ کے عمل کو مکمل کرنے اور سری لنکا کو نئے قرضے حاصل کرنے کے لئے بین الاقوامی مالیاتی منڈیوں میں واپس آنے کی اجازت دینے کے معاہدوں پر دستخط ہونا ابھی باقی ہیں۔

جنوبی ایشیائی ملک کے نجی قرض دہندگان کی اکثریت نے ستمبر میں اپنے قرضوں میں 27 فیصد کٹوتی پر اتفاق کیا تھا۔

ڈیسا نائیکے کے نیشنل پیپلز پاور (این پی پی) اتحاد نے اس سے قبل تنظیم نو کے معاہدے کو غریب ملک کے ساتھ غیر منصفانہ قرار دیتے ہوئے تنقید کا نشانہ بنایا تھا اور اقتدار میں آنے کے بعد دوبارہ مذاکرات کرنے کا عہد کیا تھا۔

لیکن گزشتہ ماہ قبل از وقت پارلیمانی انتخابات میں کامیابی کے بعد سے انہوں نے یو ٹرن لیتے ہوئے کہا ہے کہ معاشی بحالی اتنی نازک ہے کہ کسی بھی تبدیلی کے ساتھ خطرے میں پڑ سکتی ہے۔

ستمبر میں طے پانے والے معاہدے کے ایک حصے کے طور پر اور نئی انتظامیہ کی جانب سے اس کی توثیق کی گئی ہے، بانڈ ہولڈرز واجب الادا سود کی ادائیگی پر 11 فیصد کٹوتی بھی کریں گے۔

سری لنکا نے 2023 میں ٹیکسوں کو دوگنا کرنے، توانائی کی سبسڈی ختم کرنے اور ریاست کی آمدنی بڑھانے کے لئے اشیائے ضروریہ کی قیمتوں میں اضافے کے بعد آئی ایم ایف کا بیل آؤٹ حاصل کیا تھا۔