شمالی ایران میں اسپتال میں آگ لگنے سے 9 افراد جاں بحق، میڈیا

ایران کے شمالی شہر رشت کے ایک اسپتال میں آگ لگنے سے کم از کم نو مریض جاں بحق ہوگئے۔

سرکاری نشریاتی ادارے آئی آر آئی بی کا کہنا ہے کہ گھیم اسپتال میں آگ مقامی وقت کے مطابق رات ڈیڑھ بجے لگی اور اس پر قابو پا لیا گیا ہے اور تفتیش کار اس بات کا تعین کر رہے ہیں کہ اس کی وجہ کیا تھی۔

رشت میں واقع گیلان یونیورسٹی آف میڈیکل سائنسز کے صدر محمد تاگی اشوبی کا کہنا تھا کہ ’بدقسمتی سے آگ لگنے کے اس حادثے میں 9 افراد جان کی بازی ہار گئے۔‘

انھوں نے سرکاری ٹی وی کو بتایا کہ ’مرنے والے زیادہ تر مریض ہیں… انہیں انتہائی نگہداشت کے یونٹ میں داخل کرایا گیا تھا۔

رپورٹس کے مطابق اسپتال میں 250 بستر ہیں اور ان میں سے 142 پر آگ لگنے کے وقت مریض موجود تھے۔

نومبر 2023 میں، گیلان صوبے میں بھی لنگروڈ شہر میں منشیات کی بحالی کے مرکز میں ایک زبردست آگ لگ گئی، جس میں 32 افراد جاں بحق ہوئے۔

جون 2020 میں شمالی تہران کے ایک کلینک میں گیس کنستروں کی وجہ سے ہونے والے طاقتور دھماکے میں 19 افراد جاں بحق ہو گئے تھے۔