روس نے چھ ہفتوں میں ڈرون حملوں کا بڑا نیا اڈہ تعمیر کرلیا، سیٹلائٹ تصاویر سے انکشاف

روس نے یوکرین کے قریب ڈرون حملوں کی صلاحیت بڑھانے کے لیے صرف چھ ہفتوں میں نیا بڑا اڈہ تعمیر کرلیا ہے، جو تقریباً 126 فٹ بال گراؤنڈز کے برابر رقبے پر پھیلا ہوا ہے۔ رائٹرز کے مطابق سیٹلائٹ تصاویر اور دفاعی ماہرین کے تجزیے سے ظاہر ہوتا ہے کہ اڈہ تکمیل کے قریب ہے۔

ماہرین کا کہنا ہے کہ یہاں روس کے جدید جیٹ انجن والے ’جیران 4‘ اور ’جیران 5‘ ڈرونز لانچ کیے جا سکیں گے۔ یہ ڈرون 600 کلومیٹر فی گھنٹہ تک رفتار سے پرواز کرسکتے ہیں، جس کے باعث یوکرین کے لیے انہیں روکنا مشکل ہورہا ہے۔

یوکرینی فوجی اعداد و شمار کے مطابق روس نے رواں موسم گرما میں تین ماہ کے دوران جیٹ ڈرونز کا استعمال تقریباً چھ گنا بڑھایا۔ ماہرین کے مطابق نیا اڈہ 24 گھنٹوں میں 100 یا اس سے زائد جیٹ ڈرونز داغنے کی صلاحیت رکھ سکتا ہے، تاہم اس کا انحصار دستیاب وسائل اور فوجی اہداف پر ہوگا۔

یہ اڈہ روس کے شہر میلروو کے فضائی اڈے سے تقریباً ساڑھے تین کلومیٹر دور واقع ہے اور وہاں موجود فضائی دفاعی نظام یوکرین کے ممکنہ حملوں کو مشکل بنا سکتا ہے۔

دفاعی ماہرین کے مطابق روس کی تیزی سے بڑھتی ڈرون صلاحیت یوکرین کے ساتھ نیٹو ممالک کے لیے بھی چیلنج بن سکتی ہے، کیونکہ کئی ممالک میں ڈرون حملوں کے خلاف جامع دفاعی نظام موجود نہیں۔