ایف پی سی سی آئی انتخابات: یو بی جی کا ایس ایم تنویر کو صدارتی امیدوار نامزد کرنے کا متفقہ فیصلہ
یونائیٹڈ بزنس گروپ (یو بی جی) نے فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے انتخابات 2027-28 کے لیے ایس ایم تنویر کو صدارتی امیدوار نامزد کرنے کا متفقہ فیصلہ کرلیا۔
یو بی جی کی جانب سے ایس ایم تنویر کی نامزدگی کو کاروباری برادری کی نمائندگی، صنعتی ترقی، برآمدات کے فروغ اور ملکی معیشت کے استحکام کے لیے اہم قرار دیا گیا ہے۔
یو بی جی رہنماؤں کے مطابق ایس ایم تنویر کی بصیرت افروز قیادت اور کاروباری معاملات پر گہری گرفت صنعت کاروں اور تاجروں کے مسائل کے حل میں اہم کردار ادا کر سکتی ہے۔
ان کا کہنا تھا کہ ایس ایم تنویر نے بطور نگران صوبائی وزیر صنعت و تجارت کاروباری برادری کے لیے سازگار ماحول پیدا کرنے، صنعتوں کو درپیش مسائل کے حل اور کاروبار دوست پالیسیوں کے فروغ کے لیے نمایاں اقدامات کیے جنہیں کاروباری حلقوں میں سراہا گیا۔
یو بی جی کے مطابق ایس ایم تنویر کی قیادت میں گروپ ملک بھر کے صنعت کاروں اور تاجروں کو درپیش مسائل کے حل، کاروباری سرگرمیوں کے فروغ، ملکی و غیر ملکی سرمایہ کاری میں اضافے اور اقتصادی استحکام کے لیے اپنا کردار مزید مؤثر انداز میں ادا کرے گا۔
ایس ایم تنویر کی بطور صدارتی امیدوار نامزدگی کو برآمدات میں اضافے، صنعتی پیداوار کے فروغ اور تجارتی برادری کے حقوق کے تحفظ کے لیے اہم پیش رفت قرار دیا گیا ہے۔
یو بی جی رہنماؤں نے اس عزم کا اظہار کیا کہ ایف پی سی سی آئی کے پلیٹ فارم سے کاروباری برادری کی مؤثر آواز حکومتی ایوانوں تک پہنچائی جائے گی اور صنعت و تجارت کو درپیش پالیسی، ٹیکس، توانائی، برآمدات اور سرمایہ کاری سے متعلق مسائل کے حل کے لیے بھرپور جدوجہد جاری رکھی جائے گی۔
Comments