ڈالر کے مقابلے میں روپے کی پیش قدمی جاری

انٹربینک مارکیٹ میں بدھ کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی بہتری سے 277.20 روپے پر بند ہوا۔

یاد رہے کہ منگل کو مقامی کرنسی 277.21 روپے پر بند ہوئی تھی۔

ادھر عالمی منڈی میں ڈالر بدھ کو دو ماہ کی بلند ترین سطح کے قریب مستحکم رہا، جس کی وجہ قلیل مدت میں مرکزی بینکوں کی جانب سے شرح سود میں مزید اضافے کے امکانات اور مشرق وسطیٰ کی جنگ کے خاتمے کے لیے سفارتی پیش رفت کی امید پر تیل کی قیمتوں میں کمی ہے۔

ابتدائی کاروبار میں یورو 1.1446 ڈالر پر رہا جو جولائی کے اواخر کے بعد اس کی کم ترین سطح کے قریب ہے جب کہ برطانوی پاؤنڈ 1.3337 ڈالر پر آگیا۔ ڈالر انڈیکس 100.56 پر رہا۔

بڑے مرکزی بینکوں کی جانب سے حالیہ شرح سود میں اضافوں اور سخت مالیاتی پالیسی کے اشاروں نے کرنسی مارکیٹوں میں توجہ حاصل کرلی ہے۔

سرمایہ کار اب مرکزی بینکوں سے مزید سخت مالیاتی پالیسی کی توقع کر رہے ہیں۔ امریکی فیڈرل ریزرو کے حکام نے بھی اشارہ دیا ہے کہ اگر افراط زر میں کمی نہ آئی تو شرح سود میں مزید اضافہ کیا جاسکتا ہے۔

دریں اثنا برینٹ خام تیل کے سودے 99.22 ڈالر فی بیرل پر رہے۔ اقوام متحدہ کی جنرل اسمبلی میں سفارتی کوششوں سے مشرق وسطیٰ کی جنگ کے خاتمے کی امید کے باعث تیل کی قیمتوں میں حالیہ بلند سطح سے کچھ کمی آئی ہے۔

دوسری جانب جاپانی ین 157.55 فی ڈالر پر رہا۔ سرمایہ کاروں کو خدشہ ہے کہ ین کی قدر میں مزید کمی کی صورت میں جاپانی حکام کرنسی مارکیٹ میں مداخلت کرسکتے ہیں۔ جاپانی مارکیٹیں تعطیل کے باعث بند رہیں۔