پاکستان اور سعودی عرب کے سفارتی و سرکاری پاسپورٹ رکھنے والوں کیلئے ویزے کی شرائط کے خاتمے کے معاہدے پر دستخط

نائب وزیراعظم اور وزیر خارجہ محمد اسحاق ڈار نے منگل کو اعلان کیا کہ پاکستان اور سعودی عرب نےسفارتی اور سرکاری/خصوصی پاسپورٹ رکھنے والوں کے لیے ویزے کی شرائط کے خاتمے کے معاہدے پر دستخط کر دیے ۔

منگل کو سوشل میڈیا پلیٹ فارم ایکس پر بیان میں نائب وزیراعظم و وزیر خارجہ محمد اسحاق ڈار نے کہا کہ اقوام متحدہ کی جنرل اسمبلی کے 81ویں اجلاس کے موقع پر انہوں نے اپنے بھائی شہزادہ فیصل بن فرحان کے ساتھ اسلامی جمہوریہ پاکستان اور مملکت سعودی عرب کے درمیان سفارتی اور سرکاری/خصوصی پاسپورٹ رکھنے والوں کے لیے ویزے کی شرائط کے خاتمے کے معاہدے پر دستخط کئے ہیں۔

نائب وزیراعظم نے کہا کہ یہ اہم پیش رفت اعلیٰ سطح روابط اور ادارہ جاتی تبادلوں کو مزید سہولت فراہم کرے گی اور باہمی دلچسپی کے تمام شعبوں میں ہماری دیرینہ اور برادرانہ سٹریٹجک شراکت داری کو مزید آگے بڑھانے میں معاون ثابت ہوگی۔

دفتر خارجہ نے منگل کو بتایا کہ نائب وزیراعظم اسحاق ڈار نے نیویارک میں اقوام متحدہ کی جنرل اسمبلی کے 81ویں اجلاس کے موقع پر سعودی وزیر خارجہ شہزادہ فیصل بن فرحان آلسعود سے بھی ملاقات کی۔

دونوں رہنمائوں نے پاکستان اور سعودی عرب کے گہرے اور برادرانہ تعلقات کا اعادہ کیا اور سفارتی،سرکاری اور خصوصی پاسپورٹ پر ویزے کی دو طرفہ چھوٹ کے معاہدے کاخیرمقدم کیا۔

ملاقات میں نائب وزیراعظم اسحاق ڈار نے سعودی عرب کے ساتھ پاکستان کی مکمل یکجہتی کا اظہار کرتے ہوئے اس پر حالیہ حملوں کی مذمت کی۔

دونوں رہنمائوں نے مکہ مکرمہ جوائنٹ ڈیفنس معاہدے سے متعلقہ امور بارے تبادلہ خیال اور معاہدے کی رو سے تعاون کو مستحکم بنانے ،علاقائی امن،استحکام اور سلامتی کو آگے بڑھانے کے عزم کا اظہار کیا۔

ملاقات میں اعلیٰ سطح کے رابطوں اور باہمی مفاد کے علاقائی اوردوطرفہ امور پر قریبی تعاون جاری رکھنے کی اہمیت پر بھی زور دیا گیا.