ایف بی آر نے گھی، کوکنگ آئل کی کم از کم قیمت مقرر کردی

فیڈرل بورڈ آف ریونیو (ایف بی آر) نے ستمبر 2026 کے لیے مقامی طور پر تیار کردہ گھی اور کوکنگ آئل پر سیلز ٹیکس کے درست تعین کے لیے کم از کم قیمتیں مقرر کردی ہیں، جس کا مقصد ممکنہ ٹیکس چوری اور کم قیمت ظاہر کرنے کی روک تھام ہے۔

ایف بی آر کے جاری کردہ ایس آر او 1632(1)/2026 کے مطابق سبزیوں اور حیوانی چربی و تیل، گھی اور کوکنگ آئل کی کم از کم قیمت عام طور پر گزشتہ ماہ کے آخری ہفتے میں پاکستان بیورو آف اسٹیٹسٹکس کی جانب سے جاری کردہ حساس قیمتوں کے اشاریے کے تحت قومی اوسط خوردہ قیمت کی بنیاد پر مقرر ہوگی۔

ڈیجیٹل انوائسنگ اور پیداواری نگرانی کے نظام کی پابندی کرنے والے رجسٹرڈ افراد کو فی کلوگرام 25 روپے کی رعایت دی جائے گی۔

ایف بی آر نے برانڈز کو تین کیٹیگریز میں تقسیم کیا ہے۔ کیٹیگری اے میں ڈالڈا، حبیب، صوفی، میزان، سویا سپریم اور ایوا شامل ہیں، جن کے لیے کم از کم قیمت 100 فیصد مقرر کی گئی ہے۔ کیٹیگری بی کے برانڈز کے لیے یہ قیمت 93 فیصد جبکہ کیٹیگری سی میں شامل دیگر تمام برانڈز کے لیے 85 فیصد ہوگی۔

ستمبر کے لیے کیٹیگری اے کی کم از کم قیمت 588 روپے، کیٹیگری بی کی 547 روپے اور کیٹیگری سی کی 500 روپے فی لیٹر یا کلوگرام مقرر کی گئی ہے۔

ایف بی آر کے مطابق مسلح افواج کو گھی اور تیل کی فراہمی متعلقہ معاہدے میں طے شدہ قیمت کے مطابق ہوگی۔ اگر اصل فروخت قیمت مقررہ کم از کم قیمت سے زیادہ ہوئی تو سیلز ٹیکس زیادہ قیمت پر عائد ہوگا۔ یہ نوٹیفکیشن نومبر 2026 کی ٹیکس مدت تک نافذ العمل رہے گا۔

کاپی رائٹ بزنس ریکارڈر، 2026