جنوبی فلپائن کے اسکول میں فائرنگ، ایک شخص ہلاک، 4 زخمی

جنوبی فلپائن کے ایک ہائی اسکول میں جمعہ کو فائرنگ کے واقعے میں کم از کم ایک شخص ہلاک اور چار دیگر زخمی ہو گئے۔

یہ واقعہ ملک کے جنوبی حصے میں جون سے اب تک اسکولوں میں فائرنگ کے دو واقعات کے بعد پیش آیا ہے۔

فلپائن میں ماضی میں اسکولوں میں فائرنگ کے واقعات شاذ و نادر ہی پیش آتے تھے۔

محکمہ تعلیم نے جنوبی کوتاباتو کے شہر بانگا میں فائرنگ کی اطلاع پر گہری تشویش کا اظہار کیا۔

صوبائی گورنر رینالڈو تامایو نے رائٹرز کو بتایا کہ کم از کم ایک شخص ہلاک اور چار زخمی ہوئے ہیں، تاہم انہوں نے حملہ آور یا ہلاکتوں اور زخمیوں کے حوالے سے مزید تفصیلات فراہم نہیں کیں۔ پولیس نے اس سے قبل فائرنگ کے واقعے کی تصدیق کی تھی۔

گزشتہ ماہ ایک طالب علم نے زمبوانگا کے ایک کلاس روم میں دوسرے طالب علم کو گولی مار کر ہلاک کرنے کے واقعے کو براہِ راست نشر کیا تھا، جس کے بعد اس نے خودکشی کرلی تھی۔

جون میں تاکلوبان کے ایک سرکاری ہائی اسکول پر حملے میں کم از کم تین طلبہ ہلاک اور تقریباً 20 دیگر زخمی ہو گئے تھے، جہاں دو ہم جماعت طلبہ نے اسکول کی حدود میں فائرنگ کی تھی۔

فلپائن میں اسلحہ رکھنے کے حوالے سے نسبتاً سخت قوانین نافذ ہیں، جن میں پس منظر کی جانچ اور نفسیاتی جائزے کی شرائط بھی شامل ہیں، تاہم غیر قانونی اسلحہ اب بھی گردش میں ہے۔

یہ واقعہ تھائی لینڈ میں اگست کے دوران پیش آنے والے ایک ہائی پروفائل واقعے کے بعد بھی سامنے آیا ہے، جہاں ایک طالب علم نے دارالحکومت بینکاک کے مضافات میں واقع ایک اسکول میں اندھا دھند فائرنگ کی تھی۔