زویریو نے دردیری اور وقت کو مات دے کر یو ایس اوپن کے کوارٹر فائنل میں جگہ بنا لی

ٹاپ سیڈ جرمن ٹینس اسٹار الیگزینڈر زویریو نے یو ایس اوپن میں اپنی بہترین فارم کا مظاہرہ کرتے ہوئے اٹلی کے لوسیانو دردیری کو 6-2، 6-2 اور 7-6(3) سے شکست دے کر کوارٹر فائنل میں جگہ بنا لی۔

ایونٹ میں مسلسل چوتھا نائٹ سیشن میچ کھیلنے والے 29 سالہ زویریو نے جارحانہ کھیل پیش کیا اور آدھی رات سے پہلے ہی میچ اپنے نام کر لیا۔ میچ کا اختتام رات 11:48 بجے ہوا، جس پر زویریو نے مسکراتے ہوئے کہا کہ مجھے سمجھ نہیں آ رہا کہ اتنی جلدی کیا کروں، شاید پریکٹس کورٹ چلا جاؤں یا بار… یہ محض ایک مذاق تھا۔ میں خوش ہوں کہ پچھلے میچوں کے مقابلے میں میرے کھیل کا معیار بہتر ہوا ہے۔

فرینچ اوپن چیمپیئن زویریو نے ابتدائی دو سیٹس میں مکمل تسلط برقرار رکھا۔ اگرچہ تیسرے سیٹ میں دردیری نے اپنے طاقتور فرسٹ سرو اور ڈراپ شاٹس سے سخت مزاحمت کی، لیکن زویریو نے اہم موقع پر واپسی کرتے ہوئے فتح یقینی بنائی۔ اس کامیابی کے ساتھ ہی زویریو رواں سال تمام چاروں گرینڈ سلیمز کے کوارٹر فائنل میں پہنچنے والے واحد مرد کھلاڑی بن گئے ہیں۔

یو ایس اوپن میں پانچویں بار کوارٹر فائنل تک رسائی حاصل کرنے والے زویریو کا سیمی فائنل میں جگہ بنانے کے لیے اگلا مقابلہ ڈچ کھلاڑی بوٹک وان ڈی زینڈشولپ سے ہوگا۔