انڈونیشیا میں اناک کراکاٹاؤ آتش فشاں پھٹ پڑا، پروازیں، اسکول اور ماہی گیری متاثر

انڈونیشیا کے ماؤنٹ اناک کراکاٹاؤ آتش فشاں کے پھٹنے سے خارج ہونے والی راکھ کے باعث اتوار کو متعدد ہوائی اڈوں پر پروازوں کی سرگرمیاں معطل کر دی گئیں، جس سے جکارتہ کے مرکزی ہوائی اڈے پر سیکڑوں پروازیں متاثر ہوئیں، جبکہ بعض اسکولوں کی سرگرمیاں اور ماہی گیری بھی روک دی گئی۔

جکارتہ کے سوئیکارنو ہٹا انٹرنیشنل ایئرپورٹ نے آتش فشانی راکھ کے باعث پروازیں عارضی طور پر معطل کر دیں، جس کے نتیجے میں بڑی تعداد میں مسافر ہوائی اڈے پر پھنس گئے۔ ایئرپورٹ آپریٹر انگکاسا پورا کے مطابق معطلی سے 301 پروازیں متاثر ہوئیں، جن میں 58 بین الاقوامی پروازیں شامل ہیں۔ سنگاپور ایئرلائنز نے بھی جکارتہ آنے اور جانے والی اپنی پروازیں دن بھر کے لیے منسوخ کر دیں۔

وزارتِ ٹرانسپورٹ کے مطابق اناک کراکاٹاؤ میں جمعہ کی رات سے سرگرمی جاری ہے اور اتوار کی صبح ہوائی اڈے کے قریب فضا میں آتش فشانی راکھ کی موجودگی کا پتا چلا۔ راکھ جاوا کی جانب 20,000 فٹ (6,000 میٹر) جبکہ سماٹرا کی جانب 50,000 فٹ (15,000 میٹر) تک بلند ہوئی۔

آتش فشانی راکھ کے باعث کئی مقامات پر آنکھوں میں جلن کی شکایات سامنے آنے کے بعد ہفتے کو متعدد اسکولوں نے سرگرمیاں منسوخ کر دیں، جبکہ ماہی گیروں نے بھی سمندر میں جانے کا عمل روک دیا۔

انڈونیشیا کی ڈیزاسٹر مینجمنٹ ایجنسی نے راکھ کے اثرات کم کرنے کے لیے اتوار کو موسمیاتی تبدیلی کی کارروائی، جس میں بادلوں میں مصنوعی بارش (کلاؤڈ سیڈنگ) بھی شامل ہے، شروع کرنے کا اعلان کیا۔ حکام نے شہریوں کو پرسکون رہنے، ماسک اور آنکھوں کی حفاظت کے لیے چشمے استعمال کرنے، بیرونی سرگرمیاں محدود کرنے اور گاڑی چلاتے وقت احتیاط برتنے کی ہدایت کی ہے۔

حکام نے بتایا کہ آبنائے سونڈا میں فیری سروس معمول کے مطابق جاری ہے، تاہم جہازوں کو اناک کراکاٹاؤ کے دہانے سے کم از کم 3 کلومیٹر دور رہنے کی ہدایت کی گئی ہے۔