بھارت کی مندھانا ویمنز کرکٹ میں سب سے زیادہ رنز بنانے والی کھلاڑی بن گئیں

بھارت کی اوپنر اسمرتی مندھانا نے ہانگ کانگ کے خلاف ویمنز ایشیا کپ کے میچ میں شاندار سنچری بنا کر خواتین کی بین الاقوامی کرکٹ میں سب سے زیادہ رنز بنانے کا اعزاز حاصل کرلیا۔

مندھانا نے 64 گیندوں پر 124 رنز کی جارحانہ اننگز کھیلی، جس میں 14 چوکے اور 7 چھکے شامل تھے۔ اس دوران انہوں نے سابق بھارتی کپتان متھالی راج کے 10,868 رنز کا ریکارڈ توڑ دیا۔ مندھانا کے تمام فارمیٹس میں مجموعی رنز 10,880 ہوگئے۔

اس کے علاوہ یہ ان کی 18ویں بین الاقوامی سنچری تھی، جس کے ساتھ انہوں نے میگ لیننگ اور لورا وولوارٹ کے 17،17 سنچریوں کا ریکارڈ بھی پیچھے چھوڑ دیا۔

مندھانا کی شاندار اننگز کی بدولت بھارت نے 5 وکٹوں پر 193 رنز بنائے، جبکہ جواب میں ہانگ کانگ کی ٹیم 16.2 اوورز میں صرف 56 رنز پر ڈھیر ہوگئی۔ دپتی شرما نے 3 وکٹیں حاصل کیں اور بھارت نے 137 رنز سے کامیابی حاصل کرکے ایشیا کپ کے سیمی فائنل میں جگہ بنالی۔

مندھانا نے کہا کہ انہیں اپنے بنائے گئے ریکارڈز کا علم نہیں تھا، تاہم وہ بیٹنگ سے لطف اندوز ہوتی ہیں اور ٹیم کے لیے اپنا کردار ادا کرنے پر خوش ہیں۔